South Africa
Boer deur gewapende verdagtes, swerm bye aangeval─── 07:08 Fri, 28 Oct 2022
’n 52-jarige boer en sy werknemer, van Canelands in KwaZulu-Natal, is Donderdag, 27 Oktober 2022, deur ’n swerm bye aangeval nadat verdagtes na hulle op sy kleinhoewe geskiet het.
Arrive Alive berig dat lede van die veiligheidsmaatskappy Reaction Unit South Africa (Rusa), omstreeks 09:27 na die toneel gestuur is nadat hulle berigte van ’n skietery ontvang het.
Terwyl hulle op pad was, het beamptes verneem dat die boer en sy werknemer ook deur ’n swerm bye aangeval is.
Met hul aankoms het die boer vertel dat hulle te voet met patrollie was toe hulle twee skote uit ’n hoëkaliber-geweer hoor klap het.
Hy het sy eie vuurwapen uitgehaal en hulle het in die rigting vanwaar die skote afgevuur is, gegaan.
Toe hulle onderweg verby ’n byekas geloop het, is hulle deur die swerm aangeval.
Hy het bygevoeg dat hy ’n motorfiets uit die omgewing hoor wegjaag het terwyl hy en sy werknemer probeer het om die bye ontslae te raak. Die man het verskeie steke opgedoen en mediese hulp op die toneel ontvang.
Rusa het met ’n helikopter ’n uitgebreide soektog in die omliggende suikerrietveld na die skieters begin, maar niemand is in hegtenis geneem nie.
