Volgens Strydom is 2025 vol potensiaal en bied dit die geleentheid om vernuwing en verbetering in die sektor te dryf.

Strydom beskryf landbouers as mense wat altyd met hoop na die toekoms kyk. “Die nuwe oes wat nou net geplant is, is altyd die beste een,” skerts hy. 

Hierdie hoop word wel vanjaar versterk deur ’n aantal positiewe faktore, soos dalende rentekoerse en inflasie, asook verbeterde sakevertroue.

Hoewel die nasionale verkiesing ’n verandering in politieke dinamiek gebring het, waarsku Strydom dat broodnodige verbeterings soos infrastruktuurontwikkeling en belegging nog nie volledig gerealiseer het nie. 

Hy beklemtoon egter die krag van gemeenskapsinisiatiewe: “Plaaslike gemeenskappe wat self die nodige veranderinge aanbring, toon merkbare vooruitgang.”

Vir Senwes lê die fokus van 2025 op optimalisering en groei. “Ons gaan voort om terug te belê in ons mense, strukture en voorraad,” verduidelik Strydom. 

Internasionale fokus in 2025

Die groep is tans besig met opknappingsprojekte by verskeie besigheidspunte en werk hard aan koste-optimalisering.

Internasionaal is daar ook werk aan die gang. “Ons besigheid in Europa is nog nie heeltemal waar ons dit wil hê nie, en ons gaan in 2025 sterk daarop fokus,” voeg hy by.

LEES OOK: Debbie Bester aangestel as nuwe HUB van Senwes

Strydom sluit af met ’n boodskap van praktiese hoop vir die landbougemeenskap. Hy benadruk dat hoop meer is as net ’n idee – dit gaan oor aksie en die omskepping van geleenthede. 

Hy prys die jong mense wat na hul gemeenskappe terugkeer en aktief betrokke raak by projekte wat dorpe en hul mense laat floreer.

Nuwe uitdagings en geleenthede

“Ons sien dit in skole, kerke, sportorganisasies en selfs in die ondersteuning van mense met min geleenthede. Hierdie praktyke gee werklik rede tot optimisme,” sê hy.

Met 2025 wat nuwe uitdagings en geleenthede bring, is Strydom vol vertroue dat die landbousektor en sy waardekettingspelers die jaar ten volle sal benut. “Ons het geweldige veerkragtigheid en innovasie in ons gemeenskappe – iets wat ons sal dryf om sukses te behaal,” sluit hy af.

OFM Agri mvh