Beesvleispryse toon gemengde tendense

Die nasionale gemiddelde speenkalfprys het soos verwag gestyg na R33,46/kg, met uit-die-hand verkope wat hoër was teen R35,96/kg. Ligter kalwers (160-200 kg) het gemiddeld op R32/kg verhandel, terwyl swaarder kalwers (250+ kg) op R31/kg staan. 

Die Vrystaat se gemiddelde prys het gestyg na R33,92/kg, en Noordwes na R33,08/kg. Tog het die A2/A3-karkasprys effens gedaal na R58,12/kg, en die C-graadprys na R49,26/kg. 

Dit word toegeskryf aan laer verwagte vraag gedurende Januarie.

Skaap-, lamsvleis en wolmark

Stoorlampryse het met 5% gestyg na R40,01/kg, terwyl slaglampryse effens hoër is op R40,12/kg. Direkte verkope bly egter laer met stoorlammers op R39,81/kg en slaglammers op R39,78/kg. 

Die A2/A3-prys het skerp gestyg na R96,48/kg weens beter vraag en beperkte aanbod, terwyl C2/C3-pryse ook gestyg het na R66,80/kg.

Wolpryse het op die eerste veiling van 2025 gestyg, met RWS-skoonwolpryse op R169,65/kg en nie-RWS-wol op R166,08/kg. Die rand se verswakking ondersteun verder prysverhogings in komende veilings.

Ander vleismarkte

Hoendervleispryse het ook gestyg, met vars hoender nou op R41,07/kg en gevriesde hoender op R34,38/kg. 

Varkvleispryse het onder druk gekom, met spekvark nou op R32,55/kg en vleisvark op R33,28/kg. Die borsvarkprys het verder gedaal na R25,25/kg. 

Bokpryse het egter gestyg, met groot bokke op R59,52/kg en medium bokke op R60,78/kg.

Graanmark

Witmielie-spotpryse het gedaal na R6 660/t, terwyl geel mielies gestyg het na R5 650/t. Sojaboonpryse het gestyg na R9 640/t, en sonneblompryse staan op R10 255/t. 

Koringpryse is nou R6 105/t. Internasionale faktore, soos die VSA en Argentinië se produksieverlagings, bly pryse beïnvloed.

Uitdagings en vooruitsigte

Die verswakte rand en hoër oliepryse dra by tot stygende inflasie en moontlik hoër rentekoerse. Reënval verbeter weidingstoestande en kan die aanbod van speenkalwers verlaag, wat pryse ondersteun. 

Produsente hoop op verbeterde pryse vir teeldiere en veilings oor die komende maande.

Die mark bly egter vol onsekerheid, met internasionale beleidsveranderinge en produksieverwagtings wat plaaslike pryse beïnvloed. Produsente word aangeraai om met omsigtigheid te beplan.

OFM Agri mvh