Talle rolspelers in die Suid-Afrikaanse landbousektor woon die China-Afrika-samewerkingsberaad in Beijing by. 

Steven Engle, joernalis en aanbieder van Bloomberg se The China Show, het met John Steenhuisen, Suid-Afrika se landbouminister, gesels oor die land se strategieë om die handelstekort met China te verminder en bilaterale betrekkinge te versterk.

Steenhuisen is gepols oor hoe hy beplan om die handelstekort aan te spreek deur Suid-Afrikaanse landbouprodukte te vergroot na aanleiding van die onlangse vergaderings oor handelsbetrekkinge. 

Good morning South Africa, we’re at The 2024 Summit of the Forum on China-Africa Cooperation. The GNU in action! ???????? pic.twitter.com/RLuPaH2MDz

— John Steenhuisen MP (@jsteenhuisen) September 5, 2024

Hy het aangedui dat Suid-Afrika fokus op die bou van sterk verhoudings met China en dat landbouprodukte aan China se fitosanitêre en biosekuriteitsvereistes voldoen. Hy het beklemtoon dat daar pogings is om die verskeidenheid goedere wat aan die Chinese mark voorsien word, uit te brei, insluitend die uitbreiding van die huidige sitrus- en rooivleisuitvoer.

Engle het verder navraag gedoen oor die impak van China se ekonomiese verlangsaming en verhoogde uitvoer op Suid-Afrika se landbou-uitvoer, soos tee, wyn en avokado’s. 

Steenhuisen het erken dat dit ’n balans is tussen die beskerming van plaaslike vervaardiging en die maksimalisering van uitvoergeleenthede. Hy het ook gesê dat Suid-Afrika se regering, wat deur die eenheidskabinet verteenwoordig word, ’n fyn balans moet vind om plaaslike bedrywe te beskerm terwyl dit die uitvoermarkte uitbrei.

Met betrekking tot sy rol as minister sedert Junie, het Steenhuisen gemeld dat die regering van nasionale eenheid goed begin het en dat daar min verwagting is vir groot beleidsveranderinge. 

Hy het beklemtoon dat die verhouding met China en die deelname aan die Brics+-groepering Suid-Afrika ’n unieke kans bied om as ’n sleutel na ander afsetgebiede in Afrika op te tree, met fokus op strategiese samewerking in landbou.

Engle het ook gevra of Steenhuisen sy vorige kommentaar oor China se invloed in Afrika, veral die verwysing na China as ’n “enchanting debt trap”, gemodereer het. Steenhuisen het gereageer dat, terwyl die land groot uitdagings in terme van skuld, werkloosheid en lae ekonomiese groei ervaar, die uitbreiding van markte en die aantrek van buitelandse direkte beleggings noodsaaklik is om die ekonomie te stimuleer.

[Earlier today??] Minister @jsteenhuisen participated in an insightful interview with Bloomberg TV, where he outlined the strategic importance of expanding South Africa's trade relationship with China. #TradeRelations #DOAatwork #EconomicPartnership pic.twitter.com/WjsoimNvIo

— National Department of Agriculture (@DOAgov_ZA) September 4, 2024

Laastens het Engle gevra oor die risiko dat Suid-Afrika te veel op China vir beleggings en lenings mag staatmaak, selfs al is die land nie in dieselfde skuldposisie as Ghana, Zambië of Etiopië nie. Steenhuisen het aangedui dat dit geen groter risiko is as ander leningsituasies nie en het benadruk dat die Brics+-samewerking en die strategiese vennootskap met China, Suid-Afrika tot dusver baie bevoordeel het.

OFM Agri/Robyn Schutte cg