Volgens Wandile Sihlobo, hoofekonoom van die Landbousakekamer (Agbiz), dui die jongste indeks-resultate op ’n positiewe stemming in die sektor, wat die herstel van landbou ná uitdagings soos droogte en dieresiektes weerspieël. “Dit is bemoedigend dat geopolitieke spanning nie ’n groot negatiewe impak op die sektor gehad het nie. Hierdie optimisme behoort benut te word vir langtermyngroei.”

Hy beklemtoon verder samewerking tussen die sakegemeenskap en die regering is noodsaaklik om infrastruktuurnetwerke te verbeter, munisipale bestuur te versterk, nuwe uitvoermarkte te open en die landbou- en agrobewerkingmeesterplan te implementeer.

Die huidige vlak van die indeks dui op volgehoue optimisme onder Suid-Afrikaanse landboubesighede. Hierdie positiewe sentiment word ondersteun deur faktore soos La Niña-reën wat die 2024/25-seisoen bevoordeel, verbeterings in hawedoeltreffendheid en vordering met die beheer van dieresiektes. 

Die opname is gedurende die derde week van Februarie gedoen en dek verskeie landbousake-ondernemings in alle subsektore regoor Suid-Afrika. Die indeks weerspieël die menings van minstens 25 landboubesigheidbesluitnemers oor tien sleutelaspekte soos omset, netto bedryfsinkomste, markaandeel, indiensneming, kapitaalbelegging, uitvoervolumes en finansieringskoste.

Grafika: Agbiz

Oorsig van subindekse

• Omset: Het met 14 punte tot 60 gestyg. Optimisme was veral sterk in die vrugte- en wintergewasbedrywe.
• Netto bedryfsinkomste: Het met 28 punte tot 70 gestyg, die hoogste vlak sedert einde 2022.
• Markaandeel: Het met 3 punte tot 70 verbeter, met verhoogde vertroue in die wintergraanstreke.
• Indiensneming: Het met 13 punte tot 55 herstel, deels weens die sektor se herstel en ’n matige verhoging in die minimumloon.
• Kapitaalbeleggings: Het met 13 punte tot 75 gestyg, ondersteun deur sterk verkope van trekkers en stropers.
• Uitvoersentiment: Het met 17 punte tot 100 verbeter, wat die rekord-uitvoer van US$13,7 miljard in 2024 weerspieël.
• Algemene ekonomiese toestande: Het met 3 punte tot 65 gestyg, moontlik weens die verwagte impak van Operasie Vulindlela.
• Algemene landboutoestande: Het met 13 punte tot 80 verbeter, gedryf deur gunstige La Niña-reën en positiewe produksieskattings.

Finansieringsaspekte

Die interpretasie van skuldvoorsiening en finansieringskoste verskil van ander indekse. ’n Daling dui op ’n positiewe ontwikkeling, terwyl ’n styging finansiële druk weerspieël.

• Finansieringskoste: Het met vier punte tot 75 gedaal, in lyn met die verwagte verligting van rentekoerse.
• Skuldvoorsiening: Het met agt punte tot 50 gestyg, wat dui op voortgesette finansiële druk vir sommige boere.

OFM Agri/Verklaring cg