Tydens die 2022-kongres is die behoefte aan sulke geriewe reeds geopper weens die ineenstorting van baie landboukolleges en die groeiende behoefte aan praktiese vaardigheidsontwikkeling in die landbousektor.

Volgens Derek Mathews, uittredende voorsitter van Graan SA, is die konsep vir Nampo Tech oor ’n geruime tyd bespreek en dr. Tobias Doyer, die uitvoerende hoof, hoop die projek kan reeds in 2026 van stapel gestuur word. 

“Tobias se agtergrond in opleiding, insluitend sy stigting van ’n opleidingsinstelling in Zambië, het hierdie projek na ’n hoër vlak geneem. Sy ervaring en passie het daartoe gelei dat die proses vinniger vorder,” het Mathews bygevoeg.

Die NAMPO Tech-instelling sal op pasgemaakte opleiding fokus wat spesifiek gerig is op die behoeftes van die graanbedryf. “Ons doel is om ’n kennisbasis te skep wat die toekoms van graanproduksie sal bevorder.”

Hierdie gespesialiseerde opleidingsentrum sal nie net aan die onmiddellike behoeftes van die graanbedryf voldoen nie, maar ook die bedryf se toekoms versterk. “Behoeftegedrewe onderwys is noodsaaklik. NAMPO Tech sal ’n groot bate wees om volhoubare groei en innovasie in Suid-Afrikaanse graanproduksie te verseker.”

Mathews het ook verwys na ’n inspirerende besoek aan die Jacto-stigting in Brasilië, een van slegs twee instellings ter wêreld wat opleiding bied oor presisieboerdery vanaf konsep tot hardeware-ontwerp en vervaardiging. “Daardie tegnologie het die potensiaal om ons toekoms dramaties te beïnvloed, en ons glo dat NAMPO Tech soortgelyke geleenthede hier kan skep.”

OFM Agri cg