Health
‘Noodsaaklike inentings vir volwassenes is baie belangrik’─── CHARNÉ VAN DER MERWE 13:37 Mon, 10 Jun 2024
![‘Noodsaaklike inentings vir volwassenes is baie belangrik’ ‘Noodsaaklike inentings vir volwassenes is baie belangrik’ | News Article](https://oscar.ofm.co.za/img/54a8b9bc-5324-48c9-a6ff-7a19d856ee5a.jpg?crop=0,0,473,266)
“Dit kan egter ook geen skade doen om weer inentings te ontvang as jy dit reeds gehad het nie.”
Gedink jy is klaar met entstowwe ná jou kinderjare? Dink weer.
“Volwasse inentings is van kardinale belang om jou gesondheid en die gesondheid van diegene rondom jou te handhaaf,” sê dr. Chantelle van der Bijl, ook bekend as Bloem MomDoc op sosiale media.
‘Dit is beter om veilig te wees’
“Entstof- voorkombare siektes is steeds algemeen, en soos jy ouer word, kan immuniteit teen jou kinderjare-entstowwe afneem. Ook weet jy dalk nie watter entstowwe jy as kind gekry het nie, so dit is beter om veilig te wees en jou volwasse inentings te kry.”
Dit kan egter ook geen skade doen om weer inentings te ontvang as jy dit reeds gehad het nie. Sy verduidelik dat inenting baie belangrik is, want soos jy ouer word, verhoog jou risiko om infeksies op te doen weens ’n verswakkende immuunstelsel.
Kwesbare volwassenes moet jaarliks ‘n griepinspuiting kry. Foto: iStock
“Boonop maak baie individue staat op die beskerming van kudde-immuniteit, wat plaasvind wanneer ’n hoë persentasie van die bevolking ingeënt word. “Dit beskerm diegene wat nie ingeënt kan word nie of wat nie ’n immuunreaksie op entstowwe ontwikkel nie.”
Van der Bijl beklemtoon die belangrikheid van die griepentstof. “Griep is ’n algemene virale respiratoriese siekte wat dodelik kan wees, veral vir hoërisiko-individue. ’n Jaarlikse griepinspuiting is noodsaaklik om jouself te beskerm teen die veranderende stamme elke jaar.”
Nog ’n belangrike inenting is die Adacel Quadra of Boostrix Tetra, wat teen tetanus, witseerkeel, kinkhoes en polio beskerm. Hierdie inenting moet gereeld gekry word.
Van der Bijl verduidelik hoekom elke siekte gevaarlik is:
- Tetanus word deur bakterieë (Clostridium tetani) veroorsaak en produseer ’n gifstof wat die senuweestelsel aantas en lei tot spierstyfheid. Dit kom gewoonlik deur ’n wond die liggaam binne.
- Witseerkeel word veroorsaak deur Corynebacterium diphtheria. Dit produseer ’n gifstof wat asemhalingsprobleme, hartversaking, verlamming en dood kan veroorsaak.
- Kinkhoes is ’n hoogs aansteeklike respiratoriese siekte en kan dodelik wees vir babas jonger as een jaar.
- Polio, ’n aansteeklike siekte wat deur die poliovirus veroorsaak word, kan die sentrale senuweestelsel aantas en spierswakheid en verlamming veroorsaak.
Inenting teen waterpokkies is baie belangrik. Foto: iStock
Volwassenes moet ook ’n Priorix-inenting teen masels, pampoentjies en rubella ontvang. “Masels is ’n hoogs aansteeklike virusinfeksie wat ernstige komplikasies kan veroorsaak, insluitend long- en oogprobleme.
“Pampoentjies is ’n virusinfeksie wat die speekselkliere aantas, wat moontlik manlike onvrugbaarheid kan veroorsaak, en rubella, ook bekend as Duitse masels, kan ernstige geboortedefekte veroorsaak as dit tydens die eerste trimester deur ’n swanger vrou opgedoen word.”
‘Waterpokkies kan ernstige komplikasies veroorsaak’
“Waterpokkies kan ernstige komplikasies by volwassenes veroorsaak, insluitend virale longontsteking en gordelroos later in hul lewe. Twee dosisse Onvara of Varilix moet binne ’n tydperk van ses weke ingespuit word,” sê sy.
Vir pasiënte ouer as 60 jaar beveel sy aan om een dosis Zostavax vir gordelroos te kry, wat ’n heraktivering van die waterpokkievirus is. “Dit kan ’n pynlike uitslag en moontlik chroniese pyn veroorsaak.
“Pneumokokkesiekte, wat deur Streptococcus pneumoniae veroorsaak word, kan lei tot ernstige infeksies soos longontsteking en sepsis.”
Gereelde reisigers moet teen hepatitis A ingeënt word. Foto: Pixabay
Vir gereelde reisigers beveel sy inentings aan teen hepatitis A, ’n lewerinfeksie wat deur besmette kos of water versprei word. “Volwassenes moet ses maande uitmekaar twee dosisse Avaxim of Havrix ontvang.”
Sy beveel ook die Hepatitis B-entstof aan. “Hepatitis B, ’n ernstige lewerinfeksie, word deur besmette liggaamsvloeistowwe versprei. Gesondheidsorgwerkers en diegene wat aan liggaamsvloeistowwe blootgestel word, moet inenting oorweeg. Drie dosisse Engerix-B, Euvax B of Heberbiovac HBV moet op nul, een en ses maande toegedien word.”
Die Menactra-entstof is nodig vir Meningokokke-siekte. “Meningokokkesiekte, wat deur Neisseria meningitidis veroorsaak word, kan tot ernstige meningitis en lewensgevaarlike komplikasies lei. Dit is belangrik dat volwassenes een dosis Menactra-entstof ontvang.”
OFM Nuus dg