Hierdie aankondiging volg op die ondertekening van die Onteieningswetsontwerp deur President Cyril Ramaphosa, wat volgens AfriForum ’n bedreiging vir eiendomsreg inhou.

Met die ondertekening van die wetsontwerp, wat onteiening sonder vergoeding moontlik maak, het die Regering van Nasionale Eenheid (RNE) ’n “wesenlike bedreiging vir die reg op private eiendom” geskep, sê AfriForum. Die organisasie het beklemtoon dat hulle hierdie ontwikkeling as ’n rooi lyn beskou en dit met alle mag sal teenstaan.

LEES OOK: President Ramaphosa onderteken Onteieningswet

Die laaste linie van verdediging

Volgens Ernst van Zyl, hoof van Openbare Betrekkinge by AfriForum, het die regering met hierdie besluit “’n oorlog teen private eiendomseienaars verklaar”. Hy voeg verder by: “AfriForum sal alles in die stryd werp om burgers teen onteiening sonder vergoeding te beskerm. Dit wil voorkom asof AfriForum die laaste linie van verdediging is.”

Van Zyl spreek ook kritiek uit teenoor die Regering van Nasionale Eenheid se benadering tot beleid. “Die ondertekening van die Bela-wet en nou die Onteieningswetsontwerp, dui daarop dat die ANC in effek probeer om die RNE te gebruik om die voormalige opposisiepartye te koöpteer om die ANC te help om elkeen van sy vernietigende beleide deur te voer,” het hy gesê.

Regstappe as noodsaaklike optrede

AfriForum het aangedui dat hulle gereed is om die saak na die hof te neem indien enige eiendomme geteiken word vir onteiening sonder vergoeding. Die organisasie beklemtoon dat hulle alle moontlike regs- en openbare druk sal gebruik om private eiendomsreg te beskerm en die regering se beleid te stuit.

AfriForum sê hulle is ook van plan om internasionale aandag op hierdie kwessie te vestig om ondersteuning te kry vir die beskerming van eiendomsreg in Suid-Afrika. “Ons sal hierdie stryd voer totdat geregtigheid geskied,” sluit Van Zyl af.

OFM Nuus