South Africa
Valke neem verdagte in hegtenis ná uitlek van matriekuitslae─── 09:26 Fri, 17 Jan 2025
Die direktoraat van prioriteitsmisdaadondersoeke, bekend as die Valke, het ’n 21-jarige verdagte in hegtenis geneem omdat hy na bewering die 2024-matriekuitslae aanlyn uitgelek het.
Die inhegtenisneming is Donderdag gedoen nadat die departement van basiese onderwys ’n amptelike klag in Pretoria gelê het. Die saak is na die Valke oorgeplaas vir verdere ondersoek.
“Ons is dankbaar teenoor die staatsveiligheidagentskap en Valke vir hul spoedige reaksie en ondersoek,” het Siviwe Gwarube, minister van basiese onderwys, gesê nadat sy Maandag vir vinnige polisieoptrede gevra het ná die bewerings dat die uitslae verkoop is.
#sapsHAWKS The Directorate for Priority Crime Investigation (HAWKS) has made strides in the case involving the alleged leaking of the class of 2024 matric results on the internet which were allegedly being sold.
— SA Police Service ???? (@SAPoliceService) January 16, 2025
This morning, 16 January 2025, the Hawks' Serious Economic Offences… pic.twitter.com/PlyS0trhLe
Die verdagte is ook in aanhouding weens die onwettige besit van ’n vuurwapen.
Katlego Mogale, woordvoerder van die Valke, sê hul eenheid vir ernstige ekonomiese misdrywe en hoofkantoor vir kubermisdaadondersoek het Donderdag ’n deursoekings- en beslagleggingslasbrief by ’n woning in Hillcrest, noord van Johannesburg, uitgevoer.
Die 21-jarige verdagte en sy ouers was by die huis. Tydens die soektog is verskeie elektroniese toestelle en ’n ongelisensieerde haelgeweer met skerppunt-ammunisie gevind.
Die ondersoek duur voort.
OFM Nuus cg/mvh
