Dié tydperk sluit ’n kragonderbrekingsvrye winter van 1 April tot 31 Augustus in.  

Hierdie prestasie spruit uit die omvattende herstelplan wat in Maart 2023 in werking gestel is, tesame met proaktiewe beplande instandhouding wat deur die Nasionale Tesourie se skuldverligtingskema ondersteun word.  

“Die herstelplan – Generation Operational Recovery Plan – lewer voortdurend strukturele verbeterings en doeltreffendheid aan die steenkoolvloot om beurtkrag suksesvol opgeskort te hou en ononderbroke kragtoevoer te verskaf sedert 26 Maart 2024,” lui ’n verklaring wat Eskom Vrydag (11/10) uitgereik het. 

Die mylpaal beklemtoon die verbeterde betroubaarheid en werkverrigting van die kragvoorsiener se opwekkingsvloot en toenemende doeltreffendheid wat jaar-tot-jaar R12,03 miljard aan dieselbesparings aangeteken het.  

“Hierdie ononderbroke kragtoevoer is veral bewerkstellig met ’n aansienlike vermindering in die gebruik van diesel vir oopsiklus-gasturbines (OKGT’s), wat tipies aangewend word om opwekkingskapasiteit tydens spitstye te verhoog.  

“Eskom het jaar-tot-jaar R12,03 miljard se dieselbesparings aangeteken. Uitgawes aan diesel tussen 1 April en 10 Oktober 2024 het R6 miljard beloop om 915,17 GWh te genereer, ongeveer 67% (R12,03 miljard) minder as die R18,03 miljard wat verlede jaar oor dieselfde tydperk bestee is vir 2 946,86 GWh.”  

Accelerating the development of 30 GW of renewable energy by 2029 is key to NTCSA’s Transmission Development Plan. We’re committed to making this a reality through innovation and infrastructure. #GreenEnergy #GridInnovation #NTCSA pic.twitter.com/VLjtAot80E

— Eskom Hld SOC Ltd (@Eskom_SA) October 12, 2024

Intussen het Eskom ook aangekondig dat hy nie verwag dat beurtkrag gedurende die komende somerseisoen geïmplementeer sal word nie.

'Save Your Transformers, Save Lives'-veldtog  

Terwyl beurtkrag opgeskort bly, ondervind Eskom steeds netwerkoorlaaiprobleme in sekere plaaslike gebiede weens onwettige verbindings, vandalisme, meterpeutery, ongemagtigde netwerkbedrywighede, diefstal van netwerktoerusting en die aankoop van elektrisiteit van ongelisensieerde verskaffers.  

Om openbare veiligheidsgevare en die risiko van netwerkoorlading te oorkom, wat kan lei tot lasverminderingsmaatreëls en verlengde onbeplande kragonderbrekings, doen Eskom ’n sterk beroep op kliënte om onwettige verbindings te vermy aangesien dit die hele plaaslike gemeenskap negatief kan beïnvloed. 

Avoid overloading transformers! This can cause power outages and safety hazards. Report any signs of overloading to Eskom to keep your community safe!
Save Your Transformers and Save Lives! #ReportIllegalConnections #SaveYourTransformerSaveLives pic.twitter.com/uviy1UJVxa

— Eskom Hld SOC Ltd (@Eskom_SA) October 10, 2024

Dit is ook noodsaaklik vir kliënte om te verseker dat hulle slegs elektrisiteit van gemagtigde verskaffers koop.  

Eskom doen ’n beroep op die publiek om ’n aktiewe rol te speel in die beveiliging van die integriteit van die kragnetwerk deur enige onwettige aktiwiteite by die Eskom-misdaadlyn (0800 112 722) of via WhatsApp (081 333 3323) aan te meld.  

OFM Nuus cg