South Africa
Slotargumente in Oos-Kaapse gasdoodsaak uitgestel─── 05:23 Tue, 20 Aug 2024
“ ’n Trop bobbejane is die skuld gegee vir die beskadiging van ’n rookpyp wat aan die geiser gekoppel was.”
Slotargumente in die verhoor van ’n Kareedouw-gastehuiseienaar, wat aangekla word van die dubbele moord op ’n jong paartjie, is Maandag in die Gqeberha Gespesialiseerde Handelsmisdaadhof tot 1 Oktober uitgestel. Dit is nadat die verdediging aangedui het dat hulle nie gereed is om voort te gaan nie.
Kevin Pretorius (49) is in hegtenis geneem nadat Jean Vosloo (25) en sy verloofde Mari Hoon (28) in 2020 by die Kliphuis-gastehuis aan koolstofmonoksiedvergiftiging gesterf het.
‘Die egpaar se lyke is in die badkamer van die Kliphuis-gastehuis gevind’
Pretorius is in hegtenis geneem toe die egpaar se toksikologieverslae hul oorsaak van dood aan die lig gebring het. ’n Trop bobbejane is die skuld gegee vir die beskadiging van ’n rookpyp wat aan die geiser gekoppel was.
Die egpaar se lyke is in die badkamer van die Kliphuis-gastehuis gevind, op die Zuuranys-plaas sowat 17 kilometer buite Kareedouw.
’n Voormalige natuurbewaarder, Matthys de Wet, het namens die verdediging getuig. Hy is ’n kenner van vernietigende spesies en die gedrag van bobbejane. Volgens hom bestaan die waarskynlikheid dat die skade aan die geiser se rookpyp deur bobbejane aangerig kon word. Hy het gesê bobbejane veroorsaak dikwels chaos in hul soektog na kos.
Mari Hoon en Jean Vosloo. Foto: Facebook
De Wet het tydens kruisondervraging van die staatsaanklaer, Johan Jansen, toegegee dat hy nie 'n formele kwalifikasie oor die onderwerp het nie.
Hy het ook toegegee dat hy nooit die Kliphuis-gastehuis persoonlik besoek het nie en dat hy geen kennis dra van gevallestudies waar bobbejane rookpype verwyder het nie.
Pretorius is tans uit op borgtog van R1 000.
OFM Nuus cg