Australiese media het berig oor die eienaardige geval van ’n onderwyser by Marsden Hoërskool in Logan City, Queensland, wat glo vir leerders gevra het om haar as “Mev. Purr” aan te spreek. Daar word beweer dat sy na leerders gesis het en die agterkant van haar hand gelek het. Foto’s van die onbekende onderwyser toon hoe sy in die klas ‘n kopband met kat-ore dra, asook ‘n lanyard met die woorde “purr” daarop, wat ouers se kommer oor haar ongepaste gedrag verder aangevuur het.

Een ouer het beweer dat die onderwyser haar dogter laat spin het in ruil vir ‘n suigstokkie, terwyl ‘n ander gesê het dat die onderwyser na leerders gegrom het as hulle nie in die klas opgelet het nie.

“Sy dwing die kinders om haar ‘Mev. Purr’ te noem en sis en grom soos ‘n kat wanneer hulle nie luister nie,” het een ouer aan The Courier-Mail gesê. “Sy sit in die klas en lek haar hande. Dis absoluut afstootlik. Iets moet hieraan gedoen word.”

“Dit is des te meer frustrerend dat die hoofstroom-onderwysstelsel, waaraan ons elke dag ons kinders toevertrou, sulke dinge toelaat,” het ‘n ander ouer op Facebook geskryf.

Die vreemde storie het vinnig aanlyn versprei en selfs Queensland se Departement van Onderwys bereik, wat aan die media bevestig het dat Marsden Hoërskool bewus is van ouers se bekommernisse en besig is om dit aan te spreek.

“Onderwysers word aan die hoogste standaarde van professionaliteit en etiek gehou. Hierdie gedrag is onaanvaarbaar in Queensland se staatskole,” lui ‘n verklaring van die Departement van Onderwys.

Lees ook: Weird Wide Web – Mossels ‘hard aan die werk’

Te midde van hierdie ongewone skandaal het Australië se 7News berig dat die betrokke onderwyser alle beskuldigings ontken het. Sy het beweer dat sy leerders gevra het om haar Mev. Purr te noem omdat haar voorletters P.R.R. is. In ‘n opvolgartikel het The Courier-Mail aangedui dat die onderwyser nie meer by die skool werk nie, ondanks ondersteuning van die fakulteit en die onderwysersvakbond.

Lees meer cg