Die Murmansk-tak van Vladimir Poetin se Verenigde Rusland-politieke party het die kontroversiële besluit geneem om vleismeulens as geskenke aan moeders van gesneuwelde soldate in die oorlog met Oekraïne te gee ter viering van Internasionale Vrouedag. 

Oor die afgelope drie jaar het die vleismeul ’n simbool geword van die Russiese weermag se hoë ongevalsyfer in sy aanval op Oekraïne. Daarom kan die besluit van die Verenigde Rusland-party in die noordelike Murmansk-streek om moeders wie se seuns in die oorlog gesterf het, op 8 Maart met vleismeulens te vereer, op sy beste as twyfelagtig beskou word.

Foto’s wat verlede Woensdag op die party se sosialemediarekening gepubliseer is, wys die uitvoerende sekretaris van die Poljarnie Zori Verenigde Rusland-tak, Anna Machoenowa, saam met Maksim Tsjengaef, ’n verteenwoordiger van die Verdedigers van die Vaderland in die Moermansk-streek-stigting, langs vroue wat hul seuns in die oorlog teen Oekraïne verloor het – almal glimlaggend en met vleismeulens in die hand.

“Die jaar 2025 is deur die President as die Jaar van die Verdediger van die Vaderland verklaar,” lui ’n boodskap op die Poljarnie Zori Verenigde Rusland se sosialemediablad. “Dit is ons plig en verantwoordelikheid om die moeders van die Helde van die Vaderland met aandag en ondersteuning te omring – nie net met woorde nie, maar met dade. 

“Ons streef daarna om naby hierdie sterk vroue te wees, hul ervarings te deel en hulp te bied in moeilike tye. Liewe moeders, dankie vir julle moed en die liefde waarmee julle julle kinders grootgemaak het. Hul dade sal vir altyd in ons geheue bly as ’n voorbeeld van dapperheid en patriotisme vir toekomstige geslagte.”

Die foto’s het vinnig op Russiese sosiale media versprei en skerp kritiek ontlok, met beskuldigings dat Rusland se leidende party ongevoelig is teenoor die treurende moeders wat hulle kwansuis wou vereer. Lede van die Poljarnie Zori Verenigde Rusland-tak het egter teruggekap teen hul kritici en die negatiewe interpretasie van die geskenke as “onmenslik en provokatief” beskryf. 

Hulle het beweer dat een van die vroue spesifiek vir ’n vleismeul gevra het.

Lees ook: Weird Wide Web – Studies sê vroeë nagte kan die risiko van demensie verhoog

“Die vleismeul is nie deel van die standaard geskenkpakket nie, maar een vrou het daarvoor gevra, en natuurlik kon die party dit nie vir haar weier nie,” het Maksim Tsjengaef, burgemeester van Poljarnie Zori, aan joernaliste gesê.

“Ek wou eintlik self die vleismeul koop, maar julle het dit betyds vir my geskenk,” sê die vrou in ’n kort video. “Ek het in beginsel daarvoor gevra.”

Lees ook: Weird Wide Web – Groei geld op dié grond

Die probleem is egter dat die party dieselfde vleismeul aan verskeie vroue geskenk het, soos blyk uit die foto’s wat hulle self op sosiale media gedeel het. Dit maak hul verduideliking dus ongeloofwaardig. 

Dit sou dalk eenvoudiger gewees het om die hele situasie as ’n misverstand af te maak, eerder as om ’n geskenk te probeer regverdig wat duidelik in swak smaak was.

Lees meer

OFM Nuus mvh