Die afvaardiging is gelei deur Elzabé Rockman, landbou-LUR, saam met Toto Makume, LUR vir finansies, toerisme en ekonomiese ontwikkeling, en Zanele Sifuba, LUR vir sport, kuns, kultuur en ontspanning.

Hierdie belangrike vergaderings dien as ’n platform vir voorbereiding voor die komende G20-beraad, wat later vanjaar in Suid-Afrika gehou word. Suid-Afrika beklee in 2025 die G20-presidentskap, ’n historiese oomblik aangesien dit die eerste keer is dat die G20 op Afrika-bodem aangebied word.

Vergaderings van die navorsings-en-innovasiewerkgroep (NIWG) is ’n kernonderdeel van hierdie globale diskoers en bied ’n geleentheid om besprekings te bevorder oor die rol van navorsing, tegnologie en innovasie in die aanspreek van komplekse globale uitdagings soos ekonomiese stabiliteit, klimaatsverandering, ongelykheid en werkloosheid.

Rockman het tydens die drie dag lange beraad die belangrike rol van die Vrystaat in Suid-Afrika se ontwikkelingsagenda beklemtoon. Die aanbieding van sulke belangrike navorsingsvergaderings in die Vrystaat is volgens haar ’n bewys van die provinsie se groeiende betekenis in die globale ontwikkelingslandskap.
“Dit is ’n unieke geleentheid om samewerking te bevorder en wetenskap en tegnologie te gebruik om ekonomiese ontwikkeling aan te wakker, buitelandse beleggings te lok en strategiese vennootskappe te bou.”
Die landbou bly ’n sleutelpilaar van die Vrystaat se ekonomiese groeiplanne en innovasie kan die sektor verder versterk, het sy gesê. “Landbou bly ’n belangrike dryfveer van ons ekonomiese groei, en deur platforms soos hierdie kan ons ons bestaande sterk punte uitbrei en nuwe groeigeleenthede ondersoek.”

‘Noodsaaklik vir provinsiale ekonomiese groei en werkskepping’

Die Vrystaat het ook beduidende vordering gemaak in onderwys en opleiding, wat die provinsie se vermoë versterk om ’n gespesialiseerde arbeidsmag te bou wat aan die eise van ’n vinnig ontwikkelende ekonomie kan voldoen. Rockman het ook die belangrike rol van klein, mikro- en/of middeslag-ondernemings in ekonomiese ontwikkeling en werkskepping beklemtoon. 

“Hierdie ondernemings is noodsaaklik vir ons provinsiale ekonomiese groei en werkskepping. Deur hul potensiaal te benut en innovasie op grondvlak te ondersteun, kan ons volgehoue ekonomiese groei stimuleer.”

Die samewerking wat deur die G20-navorsings-en-innovasiewerkgroep bevorder word, bied ’n seldsame geleentheid om globale tegnologiese vooruitgang te verbind met plaaslike ekonomiese behoeftes. 

Deur hierdie verhoudings te versterk, kan die Vrystaat homself posisioneer as ’n leier in die aanvaarding en toepassing van gevorderde wetenskap- en tegnologie-oplossings, wat langtermyn- volhoubare groei vir die provinsie en sy mense dryf.

Verklaring verskaf

OFM Nuus mvh