Agriculture
AgriSA: Privaat eiendom die hoeksteen van volhoubaarheid en voedselsekerheid─── 19:30 Thu, 23 Jan 2025
AgriSA het sy teleurstelling uitgespreek oor die ondertekening van die Onteieningswet deur pres. Cyril Ramaphosa.
Die wet maak voorsiening vir die onteiening van grond sonder vergoeding onder sekere spesifieke voorwaardes in openbare belang.
“Die ondertekening van die Onteieningswet hou ’n risiko in vir privaat eiendomsregte, wat die primêre basis is waarop Suid-Afrikaanse landbou geskoei is. Gevolglik stel die wet landbouvolhoubaarheid en voedselveiligheid in gevaar,” sê Johann Kotzé, uitvoerende hoof van AgriSA.
“Ons sal alle beskikbare hulpbronne aanwend, in samewerking met regskenners, om eiendomswaardes en -regte te beskerm.”
LEES OOK: TLU SA betreur ondertekening van Onteieningswet
Die organisasie sê in ’n persverklaring hy het sedert 2013 aktief deelgeneem aan die NEDLAC- en parlementêre prosesse rakende die wetsontwerp, en het ook bygedra tot die 2016-weergawe van die Onteieningswet, wat die basis vorm van die onlangs ondertekende wetgewing.
Op 29 April 2024 het AgriSA ’n brief aan die president gerig, waarin hy versoek is om sy grondwetlike magte ingevolge artikel 84(2)(b) en (c) te gebruik. Die organisasie het aanbeveel dat die wetsontwerp óf terugverwys word na die Nasionale Vergadering vir heroorweging óf aan die Konstitusionele Hof voorgelê word vir ’n besluit oor die grondwetlikheid daarvan voordat dit onderteken word.
LEES OOK: President Ramaphosa onderteken Onteieningswet
In die brief het AgriSA ook verwys na ’n onafhanklike makro-ekonomiese impakstudie wat hulle laat doen het deur GOPA Group South Africa (Pty) Ltd. Hierdie studie het bevestig dat die bevordering van kapitaalvorming onlosmaaklik gekoppel is aan privaat eiendomsregte en dus ’n noodsaaklike voorvereiste is vir ekonomiese ontwikkeling, werkskepping en groei.
“Terwyl AgriSA die behoefte aan transformasie en grondhervorming in die landbousektor ondersteun, beklemtoon ons dat dit nie ten koste van die ekonomie en beleggersvertroue mag plaasvind nie,” het Kotzé bygevoeg.
AgriSA bly toegewyd aan die beskerming van privaat eiendomsregte en die bevordering van groei en stabiliteit in Suid-Afrika se landbousektor, terwyl hulle voedselveiligheid vir almal verseker.
