Dr. Tobias Doyer, die hoof- uitvoerende beampte van Graan SA, sê dié kongres bied ’n platform om belangrike kwessies in die graanbedryf te bespreek en strategieë vir volhoubare groei te ontwikkel.

Volgens Doyer is landbou-toestande in die graanproduksiestreke tans gemeng. “In die Swartland was die seisoen uiters uitdagend, maar reën het op die nippertjie gekom vir die meeste streke.” 

Sekere areas, soos suid van Bothaville, beleef egter steeds moeilike omstandighede en boere voorspel ’n swakker oes in daardie streke. Oor die algemeen verwag Graan SA ’n effens bo-gemiddelde oes.

Doyer noem dat grondsake steeds ’n brandpunt bly, terwyl internasionale kwessies soos Amerikaanse handelsbeleid en uitvoergeleenthede ook groot aandag geniet. “Boere hou diesel- en kunsmispryse fyn dop, aangesien hierdie insette ’n beduidende impak op produksiekoste het.”

Kongrestema: Van oorlewing na gedy

Die tema van vanjaar se kongres is: “Hoe beweeg ons van oorlewing na gedy in die landbou-omgewing?” Doyer beklemtoon die kongres fokus daarop om langtermynplanne te ontwikkel wat boere sal help om volhoubare groei te bereik, veral te midde van ’n nuwe regeringsomgewing met die Regering van Nasionale Eenheid.

Internasionale sprekers bied vanjaar ’n wyer perspektief met praatjies oor mieliestrategieë en selfs die realiteite van boerdery na Brexit. Plaaslike kundiges sal ook insette lewer oor praktiese strategieë vir Suid-Afrikaanse boere. 

“Ons sien uit na twee dae van intense gesprekke en samewerking.”

Afskeid van ’n leier

Doyer het ook aangekondig dat Graan SA se voorsitter, Derek Matthews, uittree. “Hy het ’n moeilike tyd in Noordwes beleef met verlede jaar se bykans totale misoes, maar sy volharding en leierskap was inspirerend,” sê Doyer. 

Hy beklemtoon dat boere, ten spyte van uitdagings, steeds voortgaan met hul beplanning en pogings om die bedryf te versterk.

Virtuele toegang tot die kongres

Vir diegene wat nie die kongres in persoon kan bywoon nie, sal die verrigtinge regstreeks uitgesaai word op Graan SA se Facebook- en YouTube-kanale. Daar sal ook geleenthede wees om via X (voorheen Twitter) deel te neem en kommentaar te lewer.

Doyer sluit af met ’n boodskap van hoop en vasberadenheid: “Boere in Suid-Afrika is veerkragtig en kreatief. Ons werk hard om oplossings te vind wat die toekoms van ons bedryf sal verseker.”

OFM Agri mvh