TLU SA se strategiese fokus vir 2025 is duidelik: om kommersiële boere te help om volhoubaar en veilig op hul grond te bly produseer. 

Van Zyl benadruk dat TLU SA se prioriteit lê by die aanspreek van alle faktore wat boere se produksievermoë beïnvloed, of dit positief óf negatief is. 

“Ons kapitaliseer op die positiewe aspekte en werk om die negatiewe in positiewe uitkomste te verander. Ons doel is om hindernisse uit die weg te ruim sodat boere hul grond optimaal kan benut.”

Die organisasie het reeds ’n uitgebreide infrastruktuur in plek wat komitees insluit wat fokus op verskeie kritieke areas soos:

• Grond- en watersekerheid.
• Veiligheidskwessies, insluitend plaasaanvalle en veediefstal.
• Beleidsomgewings wat boere se regte en eiendomsbesit beskerm.
• Navorsing, produkontwikkeling, en bemarkingsgeleenthede vir landbouprodukte.

Volgens Van Zyl funksioneer TLU SA as ’n invloedryke meganisme binne die beleidsomgewing en het die organisasie noue bande met die betrokke ministerie. “Ons ervaar tans ’n positiewe dinamika en ope interaksie met die minister van landbou, wat ons in staat stel om landboukwessies beter te hanteer.”

Van Zyl het ook kommentaar gelewer oor die uitdagende plantseisoen in 2025 weens laat somerreën in dele van die oostelike hoëveld. Hoewel gewasse soos mielies goed herstel het, bly daar onsekerheid oor oesopbrengste. 

In teenstelling daarmee ervaar dele van die Suid-Vrystaat en Noord-Kaap steeds droogtetoestande. “Ons harte gaan uit na daardie boere. Ons hoop op ’n spoedige uitkoms, want ons besef die nood is groot.”

Van Zyl het klem gelê op landelike veiligheid as een van die grootste bekommernisse. “Plaasaanvalle, veediefstal en infrastruktuurplundering bedreig boere se voortbestaan. Ons vertrou dat verbeterde samewerking tussen georganiseerde landboustrukture en die polisie hierdie kwessies effektief sal aanspreek.”

Hy het ook benadruk dat ekonomiese groei die sleutel tot Suid-Afrika se volhoubaarheid is. “Elke besluit wat geneem word, moet bydra tot ekonomiese groei deur beleggersvertroue te bou en werkskepping aan te moedig.”

OFM Agri/Robyn Schutte mvh