Met weersomstandighede wat in baie dele van Suid-Afrika skynbaar op sy kop gekeer is, wonder produsente wat die volgende seisoen inhou. Bekende meteoroloog Anika de Beer verduidelik dat daar gebruik gemaak word van ’n ensemble voorspelling. 

“Hierdie voorspelling behels ’n groep klimaatmodelle wat gebruik word om ’n aanduiding te gee van wat die seisoen inhou. El Niño en La Niña word voorspel deur die see-oppervlaktemperatuur van die Stille Oseaan te bestudeer, veral rondom die ewenaar tussen Australië en Suid-Amerika. Hierdie temperatuurveranderinge het ’n groot invloed op weerstelsels wêreldwyd, insluitend die hoog- en laagdrukstelsels wat ons weer en klimaat beïnvloed.”

Die afgelope seisoen was ’n El Niño-seisoen, gekenmerk deur bo-normale see-oppervlaktemperatuur, wat gewoonlik lei tot warmer en droër toestande in Suid-Afrika. “Boere het veral gesukkel met die midsomer-droogte in Februarie en Maart, wat gelei het tot ’n laer somergraan- en olieproduksie, met ’n verwagte afname van bykans 20% vergeleke met die vorige jaar.”

Die ensemble modelle voorspel egter dat die komende somerseisoen moontlik ’n swak La Niña kan wees. “La Niña word gekenmerk deur onder-normale see-oppervlaktemperatuur in die Stille Oseaan, met ’n afwyking van tussen minus 0,5 en minus 1 graad van die normale temperatuur. La Niña bring gewoonlik natter en koeler toestande vir Suid-Afrika, wat goeie nuus is na die droë El Niño-seisoen.”

Hoewel dit tans nog ’n swak La Niña is, hoop De Beer dat hierdie toestande sal realiseer. “Teen September en Oktober sal ’n beter aanduiding beskikbaar wees van wat die somer sal inhou, maar tans lyk dit of die komende seisoen ’n swak La Niña kan wees, wat ’n beter seisoen vir boere in die somerreënvalgebied kan beteken.”

OFM Agri mvh