’n Saak van gewone aanranding is geopen teen ’n Heidedal Primêre Skool-onderwyser.

Die Vrystaatse Departement van Onderwys het maatskaplike werkers na Olympia Primêre Skool gestuur ná die beweerde aanranding van ’n leerder (8) deur haar onderwyser.

Die voorval het op Woensdag (11/9) plaasgevind toe ’n onderwyser na bewering die leerder se gesig voor haar klasmaats teen ’n staalkas geslaan het.

“’n Saak van gewone aanranding is by die Heidedal-polisiekantoor geopen. Ondersoeke in die saak duur voort,” sê Lorraine Earle, Vrystaatse polisiewoordvoerder. 

“As departement ondersoek ons die saak wat verband hou met die toediening van lyfstraf en die aanranding van ’n leerder. Ons maatskaplike werkers het die skool besoek om berading aan leerders te verskaf,” sê Howard Ndaba, woordvoerder van die Vrystaatse Departement van Onderwys. 

Die departement wil nie die ondersoek se uitslag vooruitloop nie, maar laat ons toe dat die proses korrek ontvou. Indien daar ’n dissiplinêre verhoor plaasvind, laat ons toe om dit te voltooi. Ek is seker dat gepaste stappe geneem sal word teen enigiemand wat skuldig bevind word, sê hy.

Die departement is onmiddellik in kennis gestel ná die beweerde aanranding plaasgevind het en foto’s van die meisie se geswelde en gekneusde gesig op sosiale media versprei is.

Dieselfde laerskool in Heidedal was ook onlangs in die nuus toe verontwaardigde inwoners geëis het dat die waarnemende skoolhoof moes bedank. Onderwysers en leerders is in Augustus verhoed om die skoolterrein te betree toe betogers die ingang geblokkeer, gesing en motorbande voor die skoolhek aan die brand gesteek het.

“Die skoolhoof, Maggie Lebakeng, is geskors hangende die voortgaande ondersoek,” sê Ndaba.

‘‘Ouers word aangemoedig om sulke voorvalle by die betrokke owerhede aan te meld’

“Ons doen ’n beroep op ouers om te verseker dat voorvalle van hierdie aard, soos die beweerde aanranding, sonder huiwering aan die relevante regeringsowerhede verwys word om wetgewing na te kom en leerders se regte te respekteer.”

OFM Nuus/Zenande Mpame mvh/cg