South Africa
Verdagte in hof ná biokinetikus se ontvoering─── 17:48 Thu, 23 Mar 2023
’n Man wat moontlik met die ontvoering van ’n biokinetikus van Gqeberha verbind kan word, het Maandag sy eerste hofverskyning gemaak.
Hy sal na verwagting Vrydag aansoek doen om borgtog, berig Netwerk24.
Die 30-jarige Riana Pretorius is ’n week gelede buite haar werkplek ontvoer. Hoewel twee verdagtes reeds in verband met haar verdwyning in hegtenis geneem is, word sy steeds vermis.
Die polisie weier om enige verdere inligting in verband met die ondersoek bekend te maak, berig Maroela Media.
LEES OOK: Twee vas ná biokinetikus van Gqeberha se ontvoering
Kapt. Yolisa Mgolodela, Valke-woordvoerder, het vroeër die week gesê sy kan geen verdere inligting oor die saak deel nie aangesien die ondersoekspan “vir Pretorius se lewe vrees”.
Luxolo Tyali, NVG-woordvoerder, sê ’n verdagte het Maandag in die Baaise landdroshof verskyn.
Die 40-jarige Xolisile Rawutini staan voorlopig tereg op aanklagte van die onwettige besit van ’n vuurwapen en ammunisie. Hy word nie van Pretorius se ontvoering aangekla nie.
Die tweede verdagte het luidens berigte steeds nie in die hof verskyn nie.
Facebook-gebruikers deel nog daagliks gebede vir Pretorius se veilige vrylating.
