Van 13 April tot 13 Oktober 2025 sal Oita se hooflughawe herdoop word tot “Oita Hello Kitty Lughawe” as deel van ’n toerismeveldtog in samewerking met Sanrio, die maatskappy agter Hello Kitty en ander geliefde karakters.

Die veldtog sal plaasvind tydens die Wêreldtentoonstelling 2025 in Osaka, wat na verwagting meer as 28 miljoen besoekers van regoor Japan en die wêreld sal lok. Die organiseerders van die veldtog sê hulle wil van Oita Lughawe “die gewildste lughawe in die wêreld” maak en hoop om toeriste van binne én buite Japan welkom te heet.

Oita het ’n spesiale verbintenis met Sanrio.

Die prefektuur is die tuiste van Harmonyland, ’n Sanrio-temapark in Hita, Oita. Die park, wat in 1991 geopen is, is een van slegs twee Sanrio-parke in Japan. 

By Harmonyland kan besoekers vertonings kyk, ritte geniet, en gewilde karakters soos My Melody, Cinnamoroll, Pompompurin en Hello Kitty self ontmoet.

As deel van die hernoeming sal die lughawe met verskeie Sanrio-karakters versier word. Besoekers sal ook van Augustus tot Oktober ’n spesiale pendelbus tussen die lughawe en Harmonyland kan gebruik.

Daar sal ook verskynings van Sanrio-karakters wees by geleenthede soos die 2025 Tour de Kyushu-fietsresies, waarvan een van die fases in Oita plaasvind.

Oita is reeds ’n gewilde reisbestemming vir Japannese toeriste. Dit is veral bekend vir sy warmwaterbronne, met dorpe soos Beppu en Yufuin wat besoekers van regoor die land lok.

Dit is ook gewild onder internasionale toeriste – in 2024 het die prefektuur ’n rekord van 1,5 miljoen buitelandse besoekers verwelkom.

Met hierdie veldtog hoop Oita om toerisme nóg verder aan te moedig en aan die wêreld te wys wat die prefektuur alles bied.

Lees meer

OFM Nuus mvh