Offbeat
Weird Wide Web - 'n Wonderwerk in 'n boks─── 15:12 Fri, 30 Jun 2023
'n Pasgebore baba wat in 'n Safe Haven Baby Box in Florida gelos is, is nou ’n gelukkige baba by haar nuwe ouers.
In Januarie was ’n brandbestryder in Ocala in die Amerikaanse deelstaat Florida aan diens toe hy in die middel van die nag ’n dringende waarskuwing van die Safe Haven Baby Box-stelsel ontvang het. Hierdie bokse is aangewese plekke waar ouers anoniem en veilig hul babas kan plaas as hulle nie vir hulle kan sorg nie.
Hy het dadelik daarheen gegaan en was onseker oor wat op hom sou wag.
“Om eerlik te wees, ek het gedink dit was ’n vals alarm,” het die brandbestryder aan NBC News gesê.
Tot sy verbasing het hy ’n stil en rustige baba ontdek.
“Sy het ’n bottel by haar gehad en ek het haar opgetel en vasgehou. Toe sy vir my kyk was ek onmiddellik lief vir haar," sê man wat verkies om anoniem te bly.
By die hospitaal het hy ’n nota by haar gelos.
"Ek het verduidelik dat ek en my vrou al tien jaar sukkel om ’n baba van ons eie te hê. Ons het al ons klasse in die deelstaat Florida voltooi en is geregistreer om aan te neem," het hy gesê.
Lees ook: Weird Wide Web - Vrou sit skoonma op haar plek ná vreemde verjaarsdaggeskenk
Twee dae later was Zoey by hom en sy vrou en het sy ’n nuwe tuiste gevind.
"Die manier waarop ek haar gevind het ... dit was God wat ons gehelp het," sê hy.
