Dit is al amper ’n dekade sedert daar die eerste keer oor die talentvolle mnr. Nigel Richards geskryf is. Hy het destyds die 2015 Franse Scrabble-kampioenskap gewen, alhoewel hy nie enige Frans gepraat het nie.

Hierdie merkwaardige prestasie het destyds internasionaal nuusopskrifte gehaal.

Lees ook: Weird Wide Web – Sharaf Ishida, die professionele oorslaper

Richards was reeds bekend as die wêreld se beste Scrabble-speler met byname soos “die Tiger Woods van Scrabble”, maar hierdie prestasie was ongehoord. Iemand wat geen Frans magtig was nie, het die wêreld se beste Franssprekende Scrabble-spelers geklop en die wêreldkampioentitel verower.

Sommige het gedink dit was blote toeval, maar Nigel het hierdie prestasie herhaal deur onlangs te bewys dat hy dit ook in ander tale kan doen wat hy nie eens verstaan nie.

Verlede maand het Nigel Richards die 2024 Spaanse Scrabble Wêreldkampioenskap in Granada, Spanje, gewen, ondanks die feit dat hy nie die taal praat nie.

Hoe het hy dit reggekry? Op dieselfde manier wat hy destyds die Franse wêreldkampioenskap gewen het – deur ’n ongelooflike aantal Spaanse woorde te memoriseer, sonder om hul betekenis ook te leer.

“Die uitdaging was ’n bietjie mal, maar hy het Franse woordeskat in slegs nege weke geleer. Hy is ’n masjien. Vir hom is woorde net kombinasies van letters. Hy gebruik woorde met meer as sewe letters wat ander tien jaar neem om te leer,” het Yves Brenez, vise-president van die Belgiese Scrabble-federasie, in 2015 oor Nigel gesê.

Op een of ander manier is Nigel Richards in staat om honderdduisende woorde uit sy kop te leer en dit dan doeltreffend teen sy teenstanders te gebruik.

Volgens John Baird, sekretaris van die Christchurch Scrabble-klub waar Richards sy eerste spel gespeel het, “kan hy na ’n bladsy kyk en die hele ding onthou soos ’n foto. Daarby het hy ook ’n baie goeie vermoë om letters te meng en die moontlikhede van woorde raak te sien.”

Ons kan maar net wonder watter taal Nigel Richards volgende sal aanpak.

Lees meer

OFM Nuus mvh