Die Noordwes se LUR vir Finansies, Kenetswe Mosenogi, het die provinsiale begroting vir 2025/26 bekend gemaak, met ’n fokus op ekonomiese groei, werkskepping en infrastruktuurontwikkeling. Sy sê die begroting is gemik op inklusiewe groei en verbeterde lewensgehalte vir inwoners van Noordwes. “Wanneer ons ekonomie groei, moet ons mense ook groei.”

Die ekonomiese groepering, wat die departemente van ekonomiese ontwikkeling, omgewing, bewaring en toerisme, openbare werke en paaie, asook landbou en landelike ontwikkeling insluit, ontvang ’n totaal van R6,4 miljard. Hierdie befondsing sal aangewend word om inklusiewe groei en werkskepping te dryf.

Landbou en voedselsekerheid prioriteite

Die departement van landbou en landelike ontwikkeling ontvang R1,2 miljard vir 2025/26. Dit sluit ’n R127,2 miljoen toekenning in vir die omvattende landbou-ondersteuningsprogram, wat daarop gemik is om nuwe toetreders asook kommersiële boere se toegang tot formele markte te verbeter. Daar is ook R10 miljoen vir voedselsekerheidsprogramme en R10 miljoen vir Agrihub-projekte, wat beoog om verdere befondsing vanaf die Landbank te verkry.

Beleggings in infrastruktuur

Die departement van openbare werke en paaie ontvang R4,2 miljard vir 2025/26, met ’n groei tot R7,2 miljard oor die mediumtermyn. Van hierdie fondse is R80 miljoen bestem vir die aankoop van “Yellow Fleet” of konstruksiemasjinerie, R201 miljoen vir die konstruksie van Welisizwe-plattelandse brûe en R258,7 miljoen vir landelike paaie.

Nywerheidsontwikkeling en plaaslike vervaardiging

Die regering beoog om industriële groei aan te dryf deur middel van programme wat fokus op plaaslike vervaardiging en ekonomiese groei. Deur regeringsbesteding te gebruik as ’n hefboom, sal die departement poog om nywerheidsontwikkeling te stimuleer en kleinsake-ondernemings te ondersteun.

Grafika: Noordwes Tesourie

Veiligheid en vervoer

Die departement van gemeenskapsveiligheid en vervoer ontvang R2,4 miljard om gemeenskaps- en padveiligheid te verbeter, openbare oorsig oor polisiedienste te verbeter en vervoerdienste te koördineer. R140 miljoen word toegedeel aan leerdervervoer, en R749,7 miljoen is geoormerk vir ’n pendelbussubsidie.

Samewerking met die privaat sektor

Die provinsiale tesourie ontvang R695,1 miljoen, insluitend R100 miljoen vir die Provinsiale Ontwikkelingsfonds, wat daarop gemik is om privaatsektorbeleggings in infrastruktuurprojekte aan te moedig. Mosenogi het die privaat sektor versoek om saam te werk met die regering en gemeenskappe om volhoubare ontwikkeling te verseker.

Toerisme en klein sake-ondernemings

Die departement van ekonomiese ontwikkeling, bewaring en toerisme ontvang R1,013 miljard. Hiervan word R38,2 miljoen aan die Noordwes Ontwikkelingskorporasie toegeken, R232 miljoen aan die Noordwes Parkeraad en Toerisme, en R79,7 miljoen aan die Noordwes Dobbelraad. Hierdie beleggings word gesien as ’n belangrike stap in die skep van werksgeleenthede, veral in toerisme, wat bekend is vir sy arbeidsintensiewe aard.

OFM Agri cg