Die 48ste SA Vleismerino Kampioenskap het hierdie jaar weereens op die Bloemfontein Skougronde plaasgevind. 

Een van die telers, Hennie Vermaak van Clocolan, het sy passie vir die ras gedeel en vertel hoe hy sy oom se stoetery oorgeneem het om sy nalatenskap voort te sit. Hy sê die SA Vleismerino is uniek as die enigste ras van sy soort in die wêreld en ’n ware dubbeldoel-skaap wat beide wol en vleis van hoë gehalte lewer.

Die kompetisie het sterk deelnemers opgelewer, met meer as 400 ramme wat ten toon gestel is. Gerhard Hartman, president van die SA Vleismerino Genootskap, het sy tevredenheid uitgespreek oor die hoë gehalte diere en die toename in jong boere wat aan die kampioenskap deelgeneem het. 

“Die kompetisie is straf, en dit wys dat telers besig is om die ras na nuwe hoogtes te neem.”

Hettie de Wet van VTV Boerdery in Christiana was een van die uitblinkers en het erkenning ontvang vir hul senior kampioen van 2025. “Ons is baie tevrede met ons prestasie en voel geëerd om hier te wees tussen sulke sterk mededingers.”

Beoordelaar Jo Wilkinson van Gauteng het die kompetisie as ’n uitdagende een beskryf, aangesien baie van die ramme van uiters hoë gehalte was. “Die balans tussen wol en vleis is deurslaggewend, en ons het vanjaar uitstekende diere gesien.”

Jan Vosloo, bestuurder van die SA Vleismerino Genootskap, het die sukses van die kampioenskap aan ’n ervare span beoordelaars en die hoë standaard van diere toegeskryf. 

“Die strukturele korrektheid en loopvermoë van die ramme was uitstaande. Dit wys dat telers regtig daarna streef om die perfekte balans tussen vleis en wol te behaal.”

OFM Agri mvh