Volgens haar vereis die huidige uitdagings ’n nasionale strategie wat alle sektore, insluitend die formele en informele voedselkettings, insluit.

Sy het beklemtoon basiese kennis oor die gebruik, berging, en hantering van chemikalieë is noodsaaklik vir elke burger. “Almal het ’n kombuis – groot of klein – en almal gebruik skoonmaakmiddels of selfs gifstowwe vir plae. Dit is krities dat ons verstaan waarom hierdie chemikalieë gevaarlik kan wees en hoe om dit veilig te gebruik.”

Opleiding en bewustheid in die informele sektor

Volgens prof. Korsten het die informele sektor, wat ’n groot deel van die land se voedselproduksie en -verspreiding ondersteun, beperkte toegang tot water, sanitasie, en basiese opleiding in higiëne. “Hulle verstaan nie die belangrikheid van handewas of skoon oppervlaktes nie. Hierdie tekort aan kennis plaas nie net die produsente nie, maar ook verbruikers in gevaar.”

Sy het voorgestel bewusmaking oor higiëne en voedselveiligheid moet in die skoolkurrikulum ingesluit word. “Kinders moet leer hoekom dit belangrik is om hande te was en borde skoon te maak. Hierdie kennis sal ’n langtermyn impak hê op die gesondheid van ons gemeenskappe.”

Voedselveiligheid as nasionale fokus

Een van die kernkwessies wat prof. Korsten uitgelig het, is die gebrek aan naspeurbaarheid en regulering in die informele voedselmarkte. Sy het verwys na gevalle waar voedsel, wat ongeskik is vir menslike gebruik, steeds in die informele sektor verkoop word. “Ons moet verseker dat daar inspeksies en registrasies vir hierdie handelaars is om voedselveiligheid en kwaliteit te handhaaf.”

Sy het verder verwys na internasionale modelle, soos dié van Thailand, waar die regering saam met die gemeenskap en voedselbedryf werk om straatkos veilig, voedsaam, en bekostigbaar te maak.

Voedselsekerheid en volhoubaarheid

Die aanbieding het ook gefokus op volhoubare praktyke, soos die hantering van plaasafval en die vermindering van plaagdoderreste op voedsel. Sy het benadruk dat die formele sektor ’n groter rol moet speel in die ondersteuning van die informele sektor, insluitend die voorsiening van opleiding en voedselhulp.

“Voedsel is ’n noodsaaklike bate vir gesondheid en welstand. Ons moet mense se persepsies oor gesonde eetgewoontes verander. Dit is noodsaaklik dat ons mense aanmoedig om gesonder keuses te maak, soos om ’n appel bo ’n pakkie skyfies te kies.”

Samewerking en toekomsplanne

Prof. Korsten het voorgestel dat tegnologie, soos mobiele toepassings, gebruik word om naspeurbaarheid en bewusmaking in die informele sektor te verbeter. Sy het benadruk dat elke burger – nie net die regering nie – ’n verantwoordelikheid het om ’n veilige en gesonde voedselketting te ondersteun. “Dit is ons plig om die kwesbaarste in ons samelewing te beskerm en te bemagtig. Deur gesamentlike aksie en samewerking kan ons ’n betekenisvolle verskil maak.”

OFM Agri