Die landbouorganisasie het sy bekommernisse uitgespreek oor die volhoubaarheid van die ekonomie, terwyl dit ook ’n reeks praktiese aanbevelings vir oorweging voorgelê het.

Volgens TLU SA het die minister ’n uitdagende taak om balans te vind tussen ekonomiese groei en volhoubaarheid. In hul brief wens hulle hom sterkte toe met die verantwoordelike aanwending van fondse en beklemtoon hulle die belangrikheid van beleidsomgewings wat die landbousektor en ander besighede ondersteun.

TLU SA het verskeie sleutelareas uitgelig waarin die begroting verbeter kan word om die landbousektor te versterk:

1. Belastingverligting en Subsidies: Die uitbreiding van dieselrabatte vir kommersiële boere en BTW-verligting op landbou-insette sal boere help om kostes te beheer en volhoubare praktyke te bevorder.

2. Finansiële Ondersteuning: TLU SA pleit vir ’n staatsgesteunde rampfonds en toegang tot laer-rente lenings vir opkomende boere.

3. Infrastruktuurontwikkeling: Die organisasie het die dringende noodsaaklikheid beklemtoon om vervoerinfrastruktuur en waterbestuur te verbeter.

4. Plaasveiligheid: Meer befondsing vir plaasveiligheidsinisiatiewe is van kardinale belang om misdaad te bekamp en stabiliteit in landelike gebiede te verseker.

5. Vaardigheidsontwikkeling: Investering in opleiding en onderwys vir jongmense en nuwe boere sal die sektor versterk.

6. Reguleringsverligting: Administratiewe prosesse moet vereenvoudig word om boere en besighede te ondersteun.

7. Uitvoermarkte: Belastingaansporings vir internasionale markuitbreiding kan Suid-Afrikaanse produkte meer mededingend maak.

8. Klimaatsverandering en Navorsing: Navorsing oor klimaatsbestande landboupraktyke moet prioritiseer word om die sektor se aanpasbaarheid te verbeter.

LEES OOK: TLU SA stel strategiese fokus vir 2025 om kommersiële boere volhoubaar te bemagtig

TLU SA het benadruk dat landbou ’n fundamentele rol in Suid-Afrika se ekonomie speel. Die sektor voorsien nie net voedsel aan die bevolking nie, maar dra ook aansienlik by tot werkverskaffing en uitvoer. “Indien die regering nie die landbousektor se uitdagings prioritiseer nie, sal dit nie net die sektor benadeel nie, maar ook ’n wyer negatiewe impak op die ekonomie hê,” het TLU SA gewaarsku.

Hoop op Konstruktiewe Aksie TLU SA vertrou dat Minister Godongwana hul voorstelle sal oorweeg en in die begroting sal insluit om ’n volhoubare en groeiende ekonomie te bevorder. Hulle het die minister aangemoedig om ’n beleidsomgewing te skep wat ekonomiese groei ondersteun en die landbousektor as ’n hoeksteen van Suid-Afrika se ekonomie erken.

Hierdie voorstelle toon duidelik dat TLU SA die gesprek oor volhoubaarheid en groei binne die landbousektor wil verdiep en saam met die regering wil werk om ’n beter toekoms vir alle Suid-Afrikaners te verseker.

OFM Agri cg