Volgens Izaak Breitenbach, hoof- uitvoerende beampte van die braaikuikenafdeling, is die bedryf besig om te herstel van uitdagings soos voëlgriep en die invloed van goedkoop ingevoerde hoenderprodukte wat die mark oor die afgelope dekade oorheers het.

Verbeterde mededingendheid

“Voor 2019 het die bedryf vir byna 13 jaar kleiner geword weens gestorte invoere waarmee ons eenvoudig nie kon kompeteer nie,” verduidelik Breitenbach. 

“Sedertdien het ons daarin geslaag om strategies op te tree en die bedryf te stabiliseer. Ons sien nou ’n industrie wat groei, markaandeel terugneem en toenemend kompeterend raak.”

Fokusareas vir 2025

Die vereniging het ’n vol agenda vir 2025 en fokus op verskeie kernaspekte:

• Voëlgriepentstof: SAPV werk daaraan om staatsgoedkeuring te verkry vir ’n entstof teen voëlgriep. Dit is van kritieke belang om herhalings van die verwoestende 2023-uitbreking te voorkom.
• Uitvoermarkte: Die vereniging bevorder uitvoer na markte soos die Europese Unie, die Verenigde Koninkryk en Saoedi-Arabië. Alle voorbereidings is reeds voltooi en inspeksies van hierdie lande se owerhede word nou afgewag.
• BTW-vrystelling op hoender: SAPV het versoek dat hoender vrygestel word van BTW om voedselkoste te verlaag en hoenderproteïene meer toeganklik te maak vir Suid-Afrikaners wat dit die nodigste het.

Boodskap aan produsente

Ten spyte van die uitdagings van 2024, insluitend die voëlgriepuitbreking in 2023, is Breitenbach optimisties oor die toekoms. 

“Ons het deur buitengewone moeilike tye gekom, maar die bedryf toon veerkragtigheid en is gereed vir groei. Ons sien 2025 as ’n jaar van herstel en vooruitgang.”

Hy moedig produsente aan om vol te hou en die positiewe momentum in die bedryf te benut. “Ons verwag ’n goeie toekoms en sien uit na die verwikkelinge wat hierdie jaar sal bring.”

OFM Agri mvh