Agriculture
Landboukolleges bots oor beweerde wanvoorstellings─── 06:41 Fri, 06 Dec 2024
Die verhouding tussen ’n diensverskaffer en ’n landboukollege in Bloemfontein het so versuur dat dit waarskynlik vroeg volgende jaar in die Vrystaatse hooggeregshof gaan draai.
Die Vrystaat Landboukollege (VSLK) en die International Agriculture Academy for Africa (i3A) het die hooggeregshof in Bloemfontein genader om optrede teen die Landboukollege Vrystaat (LV) en ander respondente weens beweerde wanvoorstellings wat volgens die aansoekers skade aan hul reputasie en sake veroorsaak het.
Die LV gaan nie in hierdie stadium kommentaar lewer oor die hofaansoek wat teen hulle gebring is nie. Dr. Antonie Geyer, rektor en een van die respondente, het aan OFM Agri gesê die instansie sal later sy eie mediaverklaring uitreik.
i3A het vandeesweek in ’n verklaring gesê hulle het met regsaksie begin om ’n reeks beweerde onwettige optredes wat sy bedrywighede en reputasie nadelig beïnvloed, aan te pak.
Aansoek om interdik gebring
Die aansoek is gebring deur i3A en VSLK teen ses respondente wat insluit Geyer, LV, Christo Dippenaar, Xanadu Student Residences (Edms) Bpk wat sake doen as Die Vrystaat Landboukollege, die Universiteit van Quaggafontein (Edms) Bpk (UQF), en Twoline Training (Edms) Bpk, handeldrywend as Skills for Africa.
Johann Stassen, direkteur van i3A, meen die respondente het die instansie se “goeie naam, reputasie en intellektuele eiendom uitgebuit om studente en vennote te mislei wat groot skade aan i3A se opvoedkundige bedrywighede veroorsaak”.
Die regsaksie handel oor bewerings van valse voorstelling, ongemagtigde gebruik van vertroulike inligting en inmenging in i3A se kontraktuele verhoudings.
Gebeure in oploop tot regsaksie
Luidens die hofstukke is i3A aanvanklik deur Xanadu Student Residences wat deur Dippenaar verteenwoordig is, genader om te hoor of die instansie enige studente het wat huisvesting benodig. ’n Gesprek het toe gevolg oor i3A se satelietkampusmodel waardeur studente landboukwalifikasies kan bekom. Die Mooikrans opleidingsinstituut in Amersfoort, Mpumalanga, gebruik reeds die diensverskaffer op hierdie manier.
’n Memorandum van verstandhouding en nie-openbaarmakingsooreenkoms is in Januarie tussen die twee aangegaan. Daar is ooreengekom dat Xanadu Student Residences, bedryf as Vrystaat Landboukollege, SAQA-geakkrediteerde kursusse sal aanbied deur die i3A-aanlynplatform wat by die Agriseta registreer is.
Geyer wat by i3A werksaam was, is aangestel om die gehaltebeheer van die kursusse te handhaaf en oorsig te doen oor die studente en kampusse.
Die logo waarmee Vrystaat Landboukollege in 2023 bekendgestel is.
In Januarie 2023 is die Vrystaat Landboukollege registreer met JP Kruger wat tans die enigste direkteur is, asook Graeme Kruger en Anneke Dippenaar wat intussen as direkteure bedank het. Stassen sê in sy beëdigde verklaring hy was nie bewus wie die direkteure van hierdie maatskappy was nie.
In Mei 2023 het i3A en VSLK ’n lisensie-ooreenkoms aangegaan om AgriPedia se studiemateriaal te gebruik waarop i3A uitsluitlike gebruiksreg het. Daar is ook ooreengekom dat VSLK klasgelde sal inwin.
Die logo van die Vrystaat Landboukollege wat nou gebruik word.
Stassen voer aan hy was tussen Mei en September van daardie jaar in die hospitaal en teen sy terugkeer, het hy die VSLK-entiteit dormant gevind en sake is gedoen deur die UQF, wat in Augustus 2023 geregistreer is met dieselfde adres as die van Xanadu Student Residences.
’n Vergadering is in Oktober belê om die situasie te bespreek. Dippenaar het verduidelik UQF is gestig om sake te bedryf namens VSLK, ’n reëling wat Kruger beweer hy ook nie van bewus was nie. Op ’n vergadering in Desember is onder meer ooreengekom dat uitstaande fooie aan i3A betaal sal word.
In Januarie is Landboukollege van die Vrystaat geregistreer – ’n naam wat Stassen meen lynreg bots met die Vrystaat Landboukollege. Kruger het ook ’n klag hieroor by die Kommissie vir Maatskappye en Intellektuele Eiendom in Junie ingedien.
Landboukollege Vrystaat se logo.
In Maart het i3A weer vir VSLK gevra vir die geld wat aan hulle verskuldig is en toe geen reaksie ontvang is nie, die studente se toegang tot die e-leerplatform opgeskort. Die UQF het ’n bedrag van R371 100 oorbetaal en toegang is weer aan die studente in Junie verskaf.
Studente staak studies
Ten tyde van die sluiting van die e-leerplatform het ouers gekla omdat hul rekeninge op datum was en nie kon verstaan waarom i3A nie betaal was nie. Hulle het ook die verandering van bankbesonderhede van VSLK na UQF bevraagteken. Studente is ook uit die kollege onttrek.
In Julie het i3A by monde van ’n prokureursbrief gevra dat bedrywighede weer met VSLK hervat word en nie met UQF of LV nie om hul ooreenkoms te eerbiedig.
Intussen het Dippenaar VSLK laat weet dat 61 studente hul studie gestaak het en gevra i3A moet hul rekords aanpas.
Dippenaar het in reaksie op een van die prokureursbriewe wat in Augustus gevra het dat LV ophou sake doen onder die naam wat strydig is met VSLK, genoem dat bewerings van bedrog wat teenoor derde partye gemaak is, lasterlik is. Regsoptrede in hierdie verband sou volg. Hy het ook verwys na die afwesigheid van ’n geregistreerde handelsnaam.
Nuwe diensverskaffer aangestel
In Julie is ouers van studente by LV laat weet dat Skills for Africa die nuwe diensverskaffer is waardeur akademiese akkreditasie verkry sal word. Soos i3A, is hierdie ook ’n SAQA geakkrediteerde diensverskaffer wat by die Agriseta geregistreer is. In ’n brief wat by die hofstukke ingesluit is, het JH Potgieter, besturende direkteur, ouers die versekering gegee die eerste ses maande se studie is nie verlore nie en wat hulle tot dusver afgehandel het, geassesseer sal word. LV se perseel is ook by die Agriseta registreer as ’n werkplek vir die studente.
OFM Agri het in September LV se opedag besoek en uitgevra oor hul kursusinhoud. Geyer en Dippenaar het verduidelik die inhoud word saamgestel uit handboeke om hoë gehalte en Afrikaansonderrig te verseker. Daar is ook genoem die vorige e-leerplatform, met al die take wat die studente moet voltooi, nie so goed gewerk het nie en dat ’n meer praktiese benadering iets is waarna hulle streef. Skills for Africa bied ’n leermodel met 30% klaskamer- en 70% praktiese opleiding.
- Die respondente het tot 9 Januarie om op die aantygings te reageer en die hof is versoek om die geleentheid teen die middel van die maand op die rol te plaas.
Daar is in die hofstukke ook genoem VSLK en i3A is van voorneme om die kontrak tussen die entiteite te eerbiedig en in November is daar op die kollege se Facebookblad aangekondig dat hul onder nuwe bestuur is met Wicus Jacobs as akademiese prinsipaal. ’n Opedag word ook eersdaags aangebied. Intussen gaan opleiding voort by LV.
