Die ernstige droogte wat Noordwes gedurende 2024 ervaar het, het ’n beduidende impak op NWK Beherend Beperk se finansiële resultate gehad. Die maatskappy het Vrydag (29/11) sy tussentydse resultate bekendgemaak, wat ’n skerp afname in winsgewendheid toon, ten spyte van ’n effense styging in inkomste.

Volgens ’n verklaring wat deur NWK uitgereik is, het die groep se inkomste met 1,6% gestyg tot R2,943 miljard teenoor R2,897 miljard in 2023. Tog het die wins met bykans 48% afgeneem, van R133 miljoen in Oktober 2023 tot R69 miljoen in dieselfde tydperk van 2024.

Die grootste deel van NWK se bedieningsgebied het swaar gebuk gegaan onder onvoldoende reënval en buitengewoon hoë temperature gedurende kritieke oesontwikkelingstydperke. Dit het daartoe gelei dat slegs 40% van die gebied se verwagte oesinname gerealiseer is.

Hierdie uitdagings het ’n groot invloed op NWK se graansegment gehad, wat ’n dramatiese afname in wins beleef het, van R168 miljoen in 2023 tot R71 miljoen in 2024. Die maatskappy se handelsegment het ook teleurstellend presteer, met ’n wins van slegs R5 miljoen teenoor R17 miljoen die vorige jaar.

Te midde van die uitdagings was daar egter enkele ligpunte. Epko, NWK se sonneblomoliepersaanleg, het ’n merkwaardige wins van R27 miljoen getoon nadat sy inkomste met R502 miljoen gestyg het. Hierdie verbetering is toegeskryf aan ’n alternatiewe kragvoorsieningsprojek wat Eskom toelaat om direk elektrisiteit aan Epko en ander NWK-fasiliteite te lewer.

Hierdie ooreenkoms met die Ditsobotla Plaaslike Munisipaliteit het Epko in staat gestel om teen volle kapasiteit te werk, terwyl uitstekende kwaliteit sonneblomsaad ook ’n bydrae gelewer het. ’n Nuwe sonneblomolieverfyningsaanleg is tans in ontwikkeling en sal na verwagting Epko se kapasiteit verder verbeter.

Ten spyte van die uitdagende omstandighede het NWK aangekondig dat ’n dividend van 14 sent per aandeel – altesaam R15 miljoen – aan aandeelhouers uitbetaal sal word. Die maatskappy bly optimisties oor die toekoms, veral met verdere infrastruktuurontwikkeling en verbeterde produksiekapasiteit by Epko.

OFM Agri cg