Inspiration
Helen Bishop-tehuis vir gestremdes maak staat op Kimberley-steun─── 09:00 Wed, 27 Nov 2024
Skenkings en finansiële bydraes word benodig deur die inwoners van die Helen Bishop-tehuis in Kimberley. Die kinders en volwassenes maak staat op die goedgesindheid van die gemeenskap van Kimberley.
Die Helen Bishop Ortopediese Nasorgtehuis is ’n residensiële sentrum wat sorg, stimulasie en fisioterapie aan 60 kinders en volwassenes van die Noord-Kaap bied.
Die bestuurder van die tehuis, Chrissie Damons, gesels met Yolanda Maartens in die OFM Family Focus oor hulle behoeftes en haar betrokkenheid oor die laaste 30 jaar.
Kinders word hier geplaas deur maatskaplike werkers en howe. Foto verskaf
Baie kinders word weens verwaarlosing, mishandeling en verlating hier geplaas en bly uiteindelik tot volwassenheid by die tehuis as gevolg van ’n gebrek aan toepaslike alternatiewe opsies.
Weens ’n befondsingstekort benodig die Helen Bishop-tehuis bystand van die publiek om lopende kostes te help dek. Maak gerus kontak met Chrissie om betrokke te raak: 053 831 2447.
