Central SA
‘Brand by Lichtenburg-museum ’n skande’ – VF Plus─── KEKELETSO MOSEBETSI 15:34 Fri, 27 Oct 2023
“Die feit dat privaat maatskappye hul brandweerwaens na die toneel moes ontplooi omdat die owerhede se brandweerwaens sonder water opgedaag het, spreek boekdele.”
Die VF Plus in Noordwes het die regerende party gekritiseer weens die brand wat Lichtenburg se stadsaal en kultuurhistoriese museum vernietig het.
Die stadsaal is gedeeltelik beskadig terwyl die museumgebou en die artefakte daarin Dinsdag (24/10) deur die brand vernietig is. Die regerende party het weereens bewys niks van waarde, in hierdie geval kan kulturele waarde, kan aan sy sorg toevertrou word nie, sê Ernst Kleynhans, VF Plus-wetgewerlid.
“Die feit dat privaat maatskappye hul brandweerwaens na die toneel moes ontplooi omdat die owerheid se brandweerwaens sonder water opgedaag het, spreek boekdele,” sê hy.
The City Hall and Ampie Bosman Cultural History Museum in Lichtenburg was set on fire last night. pic.twitter.com/Y6U6fEYWJ5
— Louis Nel ???? (@LouisNel) October 25, 2023
Pius Batsile, munisipale woordvoerder van Ditsobotla, het erken dat die distriksbrandbestryders deur private maatskappye bygestaan is weens lae waterdruk van hul vloot wat aan brandkrane koppel. Kleynhans sê die kultuurskatte is vernietig weens onbevoegde bestuur.
Barry Muller van die FAK by die verwaarloosde Landboumuseum op Lichtenburg. Foto: FAK
Barry Muller van die Federasie van Afrikaanse Kultuurorganisasies (FAK) het sy ernstige kommer uitgespreek oor die stand van erfeniswaardevolle besittings, veral in Lichtenburg. Hy sê die onlangse voorval by die Lichtenburg Museum moet as ’n noodtoestand verklaar word.
Fire is being used as a weapon in South Africa - the Lichtenburg Town Hall was first, now it's the cultural museum. pic.twitter.com/9rwNrIoa6o
— k9_reaper (@k9_reaper) October 26, 2023
“Die FAK doen ’n beroep op die gemeenskappe om ons in hierdie saak te ondersteun, en as die regering aanhou om sy plig te versuim en sy eie erfeniswette oortree, sal ons optree teen die regering, soos ons met die Noordwes-landboumuseum in Lichtenburg gedoen het. Die FAK eis dat die owerheid, veral die Ditsobotla-munisipaliteit, na die tafel kom om ’n oplossing vir die situasie te vind.”
FAK-kultuurhoof Jaco Cilliers in die Lichtenburgse landboumuseum. Foto: FAK
Muller het ook beklemtoon dat die Noordwes-landboumuseum al maande lank in gevaar is en die munisipaliteit nie die artefakte daarin kan bewaar nie. Hy sê hulle wil die artefakte in veilige bewaring neem totdat die munisipaliteit die museum en terrein opgeknap het en die veiligheid van die artefakte kan verseker.
“Die FAK wil nie noodwendig die items of Afrikanererfenis as geheel privatiseer nie; ons dring bloot daarop aan dat die staat sy verantwoordelikheid nakom om alle Suid-Afrikaanse erfenis in sy bewaring te bewaar.”
Cilliers kyk na die roesskade aan die treinwa op die Lanboumuseum se terrein. Foto: FAK
Die Ampie Bosman Kultuurhistoriese Museum het uitstallings gehuisves oor die stigting van Lichtenburg in 1873, sy ryk diamantgeskiedenis, Generaal Koos de la Rey en die beleg van Lichtenburg in die 1899–1902 Anglo-Boereoorlog. “Dit is 'n skreiende skande en weerspieël die ANC en sy volgelinge se minagting vir Suid-Afrika en Lichtenburg se inwoners,” sê Kleynhans.
Intussen het Thabo Nkhashe, die Ditsobotla-burgemeester, en Nono Maloyi, waarnemende Noordwes-premier, ’n beroep op die polisie gedoen om ondersoeke te bespoedig en wie ook al vir die beweerde misdaad verantwoordelik is, in hegtenis te neem.
