Dié stap plaas Suid-Afrika in die geselskap van lande soos Sirië, Haïti, Jemen en Mosambiek.

Die waghond se besluit dui aan globale banke, finansiële instellings en beleggers dat die land nie ten volle voldoen aan standaarde teen geldwassery en terreurfinansiering nie.

Die FAFT het die besluit geneem tydens 'n vergadering vandeesweek in Parys. Die groep het Vrydagmiddag in ’n verklaring gesê Nigerië en Suid-Afrika is by die grys lys gevoeg.

Volgens News24 het dit gesê dat Suid-Afrika die afgelope maande aansienlike vordering gemaak het met baie van sy aanbevole aksies om sy stelsel te verbeter. Maar meer werk is nodig om ondersoeke en vervolging van geldwassery te verhoog, asook die beslaglegging op bates weens misdade. Agt areas van verbetering is geïdentifiseer.

Vrydag se besluit was nie onverwags nie. Enoch Godongwana, Minister van Finansies, het Woensdag met die begrotingsrede in die Parlement gesê Suid-Afrika moet “voorbereid wees vir die moontlikheid” van die gryslys.

In reaksie op die aankondiging Vrydag het Godongwana Suid-Afrika sal daaraan werk om “vinnig en doeltreffend alle uitstaande tekortkominge aan te spreek en die doeltreffendheid van sy regime teen geldwassery en teen-terroristefinansiering te versterk”.

Godongwana het gesê die Kabinet het die aksieplan oorweeg wat deur die FATF voorgestel is en het hom daartoe verbind om aktief met die waghond saam te werk.

“Die regering erken dat die aksieplan in die belang van Suid-Afrika sal wees, en dat dit in ooreenstemming is met ons bestaande verbintenis om die instellings te herbou wat gedurende die tydperk van staatskaping verswak is” het hy in ’n verklaring gesê.

Meer omsigtigheid, hoër koste

Die plasing op die gryslys sal na verwagting die koste om sake te doen in Suid-Afrika verhoog deur die aantal omsigtigheidsondersoeke wat maatskappye moet uitvoer te verhoog.

Suid-Afrikaners kan dit ook moeiliker vind om fondse na die buiteland te stuur en transaksies met internasionale banke te doen.

Die gryslys het ook histories gelei tot 'n afname in buitelandse beleggings. ’n Verslag deur die navorsingsfirma Intellidex het verlede jaar opgemerk dat kapitaalvloei, direkte buitelandse belegging en portefeulje-invloei almal geneig is om te daal nadat ’n land op die gryslys geplaas is.

Besturende Direkteur van Intellidex, Peter Attard Montalto, het Vrydag in 'n nota gesê hoewel die besluit verwag word, is dit steeds "baie jammer".

Vir Suid-Afrika om vinnig van die lys verwyder te word, sal daar 'n "toename moet wees in die pogings van die hele regering wat van bo af gelei word," veral rondom die strafregsektor.

"Ons sien beperkte mark- en groei-impakte op kort termyn, maar dit sal mettertyd groei as buitelandse banke dink dat Suid-Afrika op die lys sal vassteek," het hy gesê. 

OFM-nuus