Watter sintuig is vir jou die belangrikste
My ore - as ek nie meer musiek kan hoor nie, sal ek doodgaan.

Beste kinderherinnering
Ek duik van Pappa se skouers die see in, hy't my altyd so opgehys op sy skouers, dan sak hy in die water in tot sy kop onder die water is en dan skiet hy regop en loods my van sy skouers die water in. Dit was die wonderlikste genot.

Death row-maaltyd
Maar die doodstraf is mos afgeskaf in onse land! As dit dan moet - Beesstert in rooiwyn, gestowe met roosmaryn en knoffel. En lekker aartappels.

Grootste tekortkoming
My ongeduld.

Jou kosbaarste besitting
My man, my kat, my familie.

Wat verveel jou
Politiek en mense wat net oor hulself wil praat.

Trotsste oomblik
Toe ek in Zimbabwe die Zambezi-rivier saam met sewe mal Duitsers in 'n rubber duck aangedurf het en al die stroomversnellings oorleef het en toe ek die erepenning van die Akademie van Wetenskap en Kuns ontvang het - oor ek kan rock in my taal. 

Noem een ondeug
My ongeduld.

Wat maak jou bang
Die onnoselheid van ons leiers.

In watter land sou jy graag wou woon buiten Suid-Afrika
Nederland. Ek tree al 7 jaar lank daar op en voel so tuis daar. Alles werk, daar is 'n vryheid wat ons hier nie ken nie, daar is 'n eeue lange geskiedenis wat ons verbind aan Nederland en ek en my orkes voel soos supersterre wanneer ons daar optree. En ons word as sulks behandel.

Amanda tree by Vryfees 2013 op in Volume 2 - 'n sterbelaaide FAK-Sangbundel-bekendstellingsproduksie.