Die getuie Kelly Zeegers, wie se ma Racquel (Kelly) Smith as huishulp aangestel het, het Dinsdag (11/3) in die hooggeregshof op Saldanha getuig. 

Zeegers het vertel hoe sy Smith die oggend van 20 Februarie, die dag nadat Joshlin vermis geraak het, gebel het om te vra of sy gevind is. Smith het nog geslaap. 

Zeegers het vir Smith gesê om uit die bed op te staan en aangebied om haar na die polisiekantoor te neem. Sy het ook Smith se kêrel, medebeskuldigde Jacquen (Boeta) Appollis, aangemoedig om by die soektog aan te sluit.

Sy het ook getuig dat daar geen teken op die kringtelevisie van Smith by haar ma se huis was op die dag van Joshlin se verdwyning nie. Kelly het voorheen aan die polisie gesê dat sy die dag van Joshlin se verdwyning by die werk was.

‘Aanklagte van ontvoering en mensehandel’

Die verhoor van Kelly, haar lewensmaat, Appollis, en vriend Steveno van Rhyn duur voort op Saldanha. Hulle staan tereg op aanklagte van ontvoering en mensehandel wat verband hou met die verdwyning van Joshlin. Al drie het skuld ontken.

Carlyn Zeegers, Kelly se gewese werkgewer, het Maandag (10/3) getuig en haar as ’n goeie ma beskryf. Carlyn het Smith se stryd met dwelmgebruik erken, maar het haar toewyding aan haar kinders geloof.

Smith het emosioneel geraak toe sy na haar oudwerkgewer luister. Regter Nathan Erasmus het die hof vir ’n paar minute verdaag.

‘Ons wil Joshlin terughê!’

Ander getuies het egter ’n ander prentjie van Kelly geskets en gesê dat sy met dwelmverslawing sukkel en in ’n wisselvallige verhouding met Appollis is. Refilwe Sekhobe, die ondersoekbeampte, het getuig dat die polisie inligting ontvang het dat Joshlin aan ’n tradisionele heler verkoop is. Tot dusver het agt mense getuig.

Aanklaers beweer Kelly het sedert Augustus 2023 beplan om Joshlin en haar twee ander kinders te verkoop. Getuies het berig op die dag van Joshlin se verdwyning het hulle haar en Smith gesien het met ’n sak klere. Hulle het glo in ’n wit voertuig geklim en weggery.

Die saak prikkel die gemeenskap se aandag. Skares het buite die hof saamgedrom en gesing: “Ons wil Joshlin terughê!”

Nog ’n sleutelgetuie en die “suster” van Kelly, Natasha Andrews, het emosioneel getuienis gelewer oor haar diep verbintenis met Joshlin. Natasha het saam met haar man, Lional Andrews, ’n belangrike rol daarin gespeel om Joshlin groot te maak.

Natasha het haarself as Joshlin se grootmaak-ma beskryf en getuig dat Joshlin die meeste skoolvakansies saam met haar gesin deurgebring het, insluitend die 2023/204-somervakansie. Gedurende hierdie tyd het Kelly nooit haar dogter besoek nie. Joshlin se opvoeding is tussen Kelly en die Andrews-gesin verdeel.

Andrews het voorts getuig dat sy en haar man probeer het om Joshlin aan te neem sedert 2018. Hul pogings was onsuksesvol omdat Kelly en Joshlin se biologiese pa, Josh, nie tot ’n vergelyk kon kom nie. 

Ten spyte van hul bereidwilligheid om ’n stabiele tuiste te bied, het die aanneming nooit gerealiseer nie, wat Joshlin in ’n onstabiele situasie gelaat het. 

Joshlin Smith se biologiese pa is José Emke. Hy het sy diep hartseer uitgespreek en gesê hy soek antwoorde oor sy dogter se verdwyning en gepaardgaande omstandighede.

Namate die verhoor vorder, skets die getuienisse ’n ál ontstellender prentjie van verwaarlosing, verkeerde prioriteite en die hartverskeurende werklikheid van ’n dogtertjie wat dalk deur die mense naaste aan haar in die steek gelaat is.

Hier is ’n verkorte weergawe van eNCA se tydlyn met kerngebeure:

• 19 Februarie 2024: Joshlin Smith (6) ’n gr. 1-leerling aan die Laerskool Diazville, verdwyn uit haar huis op Saldanha. Haar ma, Kelly Smith, het haar in die sorg van haar kêrel, Jacquen Appollis, gelos omdat sy siek was.
• 20 Februarie 2024: ’n Grootskaalse soektog na Joshlin begin, wat die polisie se honde-eenhede, NRO’s, vrywilligers, helikopters en reddingsbote insluit.
• 27 Februarie 2024: Appollis beweer hy het Joshlin laas gesien buite speel en voel verantwoordelik, maar weet nie wat met haar gebeur het nie.
• 2 Maart 2024: Bloedbevlekte klere, wat vermoedelik aan Joshlin behoort, word gevind en die soektog verskerp met die vloot se betrokkenheid.
• 5 Maart 2024: Drie mense word in hegtenis geneem in verband met Joshlin se verdwyning, waarvan twee skuld beken.
• 7 Maart 2024: Die beskuldigdes – Joshlin se ma, haar kêrel, ’n vriend en ’n vermeende sangoma – verskyn in die Vredendal-landdroshof en word aangekla van mensehandel en ontvoering.
• 10 Maart 2024: Die soektog na Joshlin strek verder as die Wes-Kaap.
• 15 April 2024: Ondersoeke dui daarop dat Joshlin moontlik per boot landuit geneem is. Die soektog na Joshlin verskuif oorsee.
• 15 Julie 2024: Die saak word ná kort hofverrigtinge tot September uitgestel.
• 16 September 2024: Die saak word tot 21 Oktober uitgestel vir nuwe getuienisvoorlegging.
• 21 Oktober 2024: Laurentia Lombard, ’n vriendin van Kelly, word ’n staatsgetuie.
• 31 Januarie 2025: Die voorverhoor word weens logistieke kwessies tot 28 Februarie uitgestel. Regter Gayaat-Salie da Silva sê die hof oorweeg om die verhoor op Saldanha, ’n sentrale plek, te hou sodat plaaslike belangstellendes dit kan bywoon. Joshlin se ouma sê sy verwelkom die planne om die verhoor na Saldanha te skuif en hoop meer inligting sal aan die lig kom oor waar haar kleindogter is.
• 19 Februarie 2025: ’n Jaar sedert Joshlin se verdwyning met geen spoor van haar nie. Provinsiale polisiebeamptes sê die ondersoek en soekoperasies duur voort.
• 3 Maart 2025: Die verhoor van Smith, Appollis en Van Rhyn begin in die hooggeregshof op Saldanha.

OFM Nuus mvh