South Africa
Jong mense ervaar meeste finansiële stres─── HEIDRÈ MALGAS 14:28 Mon, 29 Jul 2024
![Jong mense ervaar meeste finansiële stres Jong mense ervaar meeste finansiële stres | News Article](https://oscar.ofm.co.za/img/b1cc3c3c-8e3f-4e14-9ef2-1700dadc7015.jpg?crop=0,33,634,390)
“Ouer en ryker mense is minder bekommerd maar het onuithoudbare skuldvlakke en is minder geneig om hulp te soek.”
Jong mense, vroue en dié met ’n laer inkomste is die meeste angstig oor finansiële spanning wat hul huislike lewe, werklewe en gesondheid beïnvloed.
Luidens DebtBusters se derde jaarlikse Money Stress Tracker-opname is ouer en ryker mense minder bekommerd, maar het onuithoudbare skuldvlakke en is minder geneig om hulp te soek, sê Benay Sager, uitvoerende hoof vanDebtBusters.
Belangrike bevindings
- ’n Effense afname in finansiële spanning van 78% in 2023 tot 75% in 2024.
- Verminderde bekommernisse oor rentekoersstygings (22% laer) en beurtkrag (daling van 17% tot 7%) het spanning verlig.
- Sowat 93% van diegene wat finansieel gestres voel, sê dit het hul huislike lewe beïnvloed,76% sê dit het hul werklewe beïnvloed en 74% het gesondheidsprobleme opgemerk.
- Vroue is 10% meer finansieel gestres as mans met beduidende bykomende spanning op huislike lewe (30%) en gesondheid (20%).
Jongmense voel vasgekeer weens hul finansiële situasie. Foto: Pixabay
Andrea Kellerman, sielkundige, skryf vroue se hoër spanning toe aan hul geneigdheid om stres uit te druk en die samelewing se verwagtinge dat hulle emosionele ondersteuning moet bied en hul gesin moet koester.
Sy sê mans en vroue hanteer stres verskillend. Mans fokus op een kwessie, terwyl vroue verskeie stressors gelyk hanteer, wat lei tot verhoogde stres vir vroue. Verder balanseer meer vroue vandag om ma's en broodwinners te wees, wat bydra tot hul finansiële spanning.
Die meeste mense se primêre bekommernisse is dat geld opraak voor die einde van die maand en om skuld af te betaal. Navorsing toon dat ouer mense met hoër inkomste die meeste druk ondervind om skuld terug te betaal, maar minder geneig is om hulp te soek weens vertrouenskwessies. Daarteenoor beoog 54% van jonger verbruikers om hul finansiële spanning aan te pak, maar weet dikwels nie wat hul opsies is nie,” sê Sager.
‘Hierdie ouderdomsgroep ervaar ook ’n vriesmodus reaksie’
Kellerman sê mense ouer as 55 jaar is meer bekommerd oor aftrede as maandelikse skuld en gewoond is aan die bestuur van langtermynskuld. Hierdie ouderdomsgroep ervaar ook ’n “vriesmodus” reaksie weens verminderde hormonale produksie wat lei tot minder energie en veerkragtigheid. Dit kan veroorsaak dat hulle stressors ignoreer wat toekomstige probleme kan veroorsaak.
“Jongmense mag vasgekeer voel en beleef stres soos beperkte werkgeleenthede, hoë koste om ’n huishouding te begin en demotivering,” sê Kellerman.
Verbruikers is bekommerd dat hulle maandeliks nie genoeg geld het nie. Foto: Pixabay
“Al is hulle dalk meer gemotiveerd, aanpasbaar, en kundig as hul ouers, soek baie nie skuldhulp nie weens onbewustheid, besluiteloosheid, of vertrouenskwessies,” sê Sager.
DebtBusters bied skuldkonsultasie en hulp aanlyn soos Debt Radar en die DebtSustainability Indicator. Hulle beplan om MoneySavers later vanjaar te begin om intekenare te help om op alledaagse uitgawes te bespaar.
OFM Nuus dg