Die speaker van die Nasionale Vergadering, Nosiviwe Mapisa-Nqakula, se dringende hofaansoek om haar inhegtenisneming weens korrupsiebewerings te keer, is van die rol geskrap. Sy staan tereg op twaalf aanklagte van korrupsie en een van geldwassery.

Regter Sulet Potterill van die hooggeregshof in Pretoria het Dinsdag (2/4) uitspraak in die dringende aansoek gelewer.

The Speaker’s application to interdict her arrest has been struck from the roll (with costs) for lack of urgency.

That means she either has to hand herself over to the police, or the police must now arrest her. #MapisaNqakula pic.twitter.com/kXbLyMz8va

— Mbekezeli (@MbekezeliMB) April 2, 2024

Terwyl Mapisa-Nqakula aangevoer het dat haar saak dringend is omdat haar waardigheid en vryheid op die spel is, het Potterill gesê die staat het dit duidelik gemaak dat hy nie borgtog vir haar sal teenstaan nie en inhegtenisneming sonder aanhouding is nie ’n grondslag vir ’n dringende aansoek nie. Dit is met koste van die hand gewys.

Potterill het in haar uitspraak gesê die effek van die verligting wat Mapisa-Nqakula soek, sal wees om “die sluise oop te maak” vir verdagtes om hul inhegtenisnemings te verbied op grond daarvan dat dit onwettig was en die saak teen hulle swak is.

Die speaker staan tereg op twaalf aanklagte van korrupsie en een van geldwassery waarby R4,5 miljoen betrokke is wat dateer uit die tydperk toe sy minister van Verdediging was.

Mapisa-Nqakula het haar tweede dringende aansoek gegrond op die feit dat haar “onregmatige inhegtenisneming” deur die staat “dreigend” was.

Nosiviwe Mapisa-Nqakula must hand herself over to the police finish and klaar!! pic.twitter.com/ermQXS9LzA

— Bantu Holomisa (@BantuHolomisa) April 2, 2024

In haar dringende aansoek het sy haarself as Suid-Afrika se “derde belangrikste funksionaris” beskryf.

Verlede maand het die Nasionale Vervolgingsgesag ’n klopjag op haar huis in Johannesburg uitgevoer op soek na bewyse wat verband hou met beweerde korrupsie.

OFM Nuus cg/mc