Die polisie het glo ’n belangrike deurbraak gemaak in die ondersoek na die moord op Kiernan Forbes, ook bekend as AKA.

AKA-moord

AKA is in Februarie buite die Wish on Florida-restaurant in Durban geskiet. Tebello "Tibz" Motsoane, AKA se vriend en 'n bekende sjef, is ook tydens die voorval doodgeskiet.

City Press berig die polisie het AKA se nabye medewerkers ondersoek. Hulle ondersoek ook lede van 'n familie wat by taxibedrywighede betrokke is. Hierdie familielede het na bewering ook bande met die konstruksie-mafia in KwaZulu-Natal.

‘Magtige en gevreesde’ familie

Bronne in die sekuriteitsbedryf het gesê AKA en Motsoane is van King Shaka Internasionale Lughawe na die restaurant agtervolg.

"Die polisie het reeds die beeldmateriaal bekom wat toon dat daar toesig gehou is deur die beweerde huurmoordenaars, wat later buite die restaurant toegeslaan het."

Nellie Tembe se dood

'n Bron beweer dat een van die verdagtes op die toneel was toe AKA se verloofde, Nellie Tembe, in 2021 in Kaapstad dood is.

Tembe het in die vroeë oggendure van 11 April 2021 van die 10de verdieping van Kaapstad se Pepperclub Hotel na haar dood geval.

Die Nasionale Vervolgingsgesag (NVG) het in Mei besluit om 'n nuwe ondersoek na Tembe se dood te open.

Die besluit kom nadat die Tembe-familie ’n brief aan die NVG geskryf het waarin hulle sê daar is 'n moontlikheid dat ’n misdaad tot Nellie se dood gelei het. Die familie beweer belangrike bewyse is geïgnoreer, insluitend:

• 'n Getuie, Rob Stefanatto, het in 'n verklaring gesê hy het 'n argument tussen 'n vrou en 'n man uit AKA se hotelkamer gehoor.
• Voor Nellie se val het die getuie beweer "hy het gehoor hoe die vrou desperaat die aanvaller, 'n man, vra om haar alleen te los".
• AKA het nie aandag aan sy beseerde verloofde gegee, wat ongeveer 20 minute nog aan die lewe gebly het nie. Stefanatto het haar probeer help en nooddienste ontbied.
• AKA “het die hotelkamer skoongemaak waar bloed op 'n paar handdoeke gevind is.
• Die rapper “het gedrink en ’n partytjie met sy gevolg in die hotel gehou ná die afsterwe van sy verloofde”.
• Nellie se vingerafdrukke is nie op die balustrade van die balkon gevind nie, wat sou aangedui het dat sy self oor die reling geklim het.

Polisie vind vuurwapen

Die City Press-verslag beweer verder dat die polisie die vuurwapen wat in AKA se moord gebruik is, teruggevind het, asook 'n voorafbetaalde lugtydbewys wat deur een van die vermeende gewapende mans gebruik is om die mense te bel wat die huurmoord gereël het.

Die polisie het ook op motors beslag gelê.

In Mei is berig dat die vuurwapen wat in die skietery gebruik is, deur beamptes in Umlazi teruggevind is. Die polisie het egter geweier om dit te bevestig en gesê die nuusberigte kan die ondersoek benadeel.

OFM Nuus