Toe Terauchi Happy se ma sy onkonvensionele naam gekies het, het sy geen idee gehad watter probleme dit vir hom deur sy lewe sou veroorsaak nie. 

Die 27-jarige man dra egter geen wrok teen sy ma nie, want sy het hom net “Happy” genoem om die oorweldigende vreugde uit te druk wat sy gevoel het toe hy gebore is. Juis daarom het hy nooit wettig sy naam verander nie, ten spyte van die ellende wat dit hom besorg het. 

Toe hy klein was, het ander kinders hom geterg en selfs geboelie oor sy naam en ongelukkig het dinge nie verbeter met ouderdom nie. Maatskappye het altyd gedink hy maak ’n grap wanneer hy sy CV ingestuur het vir werk, en sy ongewone naam het selfs romantiese verhoudings vernietig.

Terwyl hy grootgeword het, het Terauchi vieringe gehaat soos verjaarsdae of vakansiedae waar mense groete gebruik het wat die woord ‘happy’ insluit, omdat dit altyd tot tergery deur ander kinders gelei het. Wanneer hy geboelie is, het kinders goed gesê soos: “Jy is Happy, maar jy lyk nie gelukkig nie,” of “Selfs as jy geboelie word, is jy steeds Happy, reg?”

Tydens sy junior kollege se toelatingsplegtigheid, toe sy naam uitgeroep is, het almal na hom gekyk, en hy het moedeloos en magteloos gevoel, oortuig dat sy kinderdaenagmerrie weer begin. Op ’n stadium was hy vasbeslote om sy naam wettig te verander, maar toe hy aan sy ma se rede vir sy naam dink, het hy besluit om dit nie te doen nie.

LEES OOK: Weird Wide Web – Duurste hond ooit?

Toe hy begin werk soek het en CV’s moes indien, het maatskappye hom dikwels geïgnoreer omdat hulle gedink het hy skeer die gek. Selfs wanneer hy vir onderhoude ingeroep is, het mense gedink hy maak ’n grap tot hy sy ID gewys het. 

Die enigste keer wat sy naam voordelig was, was toe hy vir ’n verkoopspos aansoek gedoen het en een maatskappy dit as ’n goeie voorteken beskou het. Tydens ’n verskyning op die ABEMA Prime TV-program het Terauchi Happy beweer dat sy naam hom verhinder het om te trou. 

Terauchi Happy se identiteitsdokument. Foto: odditycentral

Toe dit tyd was om sy meisie se familie te ontmoet, kon hy sien hoe haar ouers frons toe hulle sy naam hoor, en die verhouding het uiteindelik verbrokkel. Hy het bygevoeg dat ouer mense oor die algemeen frons wanneer hulle sy naam hoor, omdat hulle nie aan sulke onkonvensionele name gewoond is nie.

Vroeër vandeesmaand het Happy se storie op Japannese sosiale media versprei, en baie mense het hul steun en aanmoediging uitgespreek.

Lees meer

OFM Nuus mvh