Gedurende die komende dae sal ‘n reeks bo-lugstelsels, insluitend ‘n bo-lugtrog en ‘n afsnylaag, wydverspreide buie en donderbuie veroorsaak. Tot die naweek sal die meeste reën in die noordelike en oostelike binneland voorkom, met ‘n nuwe reënband wat Sondag oor die westelike dele ontwikkel en dan ooswaarts beweeg. Hierdie toestande raak veral die somergraangebiede, waar aanhoudende bewolkte weer, sagte temperature en nat toestande reeds ’n impak het op produksie.

Uitwerking op somergewasse

In die mielieproduksiestreek bly dagtemperature ondergemiddeld weens die bewolkte weer, terwyl nagtemperature ietwat hoër bly weens vog in die atmosfeer. Tot Woensdag kan sommige streke in die sentrale en westelike graangebiede meer as 50 mm reën ontvang. Terselfdertyd verhoog die vogtige toestande die risiko van swaminfeksies en beperk dit toegang tot lande vir bestuurstake.

’n Kans op ligte ryp bestaan steeds in gebiede rondom die Drakensberge, met kouer minimumtemperature verwag teen die einde van volgende week – veral in die suidoostelike hoëliggende dele.

Geen ernstige hael of koue verwag nie

Hoewel die dinamiese bo-lugstelsels storms kan meebring, is geen wydverspreide of ernstige haelbuie buite die klimatologiese norm vir April verwag nie. Waar hael voorkom, sal dit waarskynlik klein wees. Daar is ook geen aanduiding van ‘n groot koue front of ernstige rypgebeurtenis tot vroeg in Mei nie.

Vooruitsigte vir die week

• Woensdag 16 April: Oorwegend bewolk en koel met buie oor die ooste; sonniger toestande in die westelike graangebiede.
• Donderdag: Sonnig tot gedeeltelik bewolk; donderbuie oor die noordooste.
• Vrydag & Saterdag: Koel en bewolk met verspreide buie oor die sentrale en oostelike dele.
• Sondag tot Woensdag (20–23 April): Reën versprei na die westelike en sentrale binneland met moontlike ryp aan die suide en Lesotho se grense later in die week.

Temperature

• Oos-graangebiede: Maksimums tussen 16°C en 24°C; minimum van tussen 7°C en 13°C.
• Wes-graangebiede: Maksimums tussen 16°C en 27°C; minimum van tussen 14°C en 18°C.

OFM Agri/Verskaf cg