Hierdie fynproewer-bederf was een van ’n rekordgetal van 1 110 inskrywings deur 77 vervaardigers wat aan vanjaar se Suid-Afrikaanse Suiwelkampioenskappe deelgeneem het — die grootste en oudste suiwelkompetisie in Afrika.

Volgens hoofbeoordelaar Graham Sutherland is die toekenning as Produk van die Jaar die hoogste eer wat ’n suiwelvervaardiger kan ontvang. “Hierdie romerige, soet en weelderige nageregkaas is uitstaande in sy perfekte balans van vye en pekanneute saam met sy gladde mascarpone. Dit is ’n droom van ’n geurervaring.”

RFG Foods se operasionele bestuurder, Robert Sudell, sê die span is besonder trots om dié titel vir die tweede keer in drie jaar te wen. “Ons het al jare lank Italiaanse kase as spesialiteit. Ons ambagskaasspan, onder leiding van Kerwick Boonzaaier, is ware meesters wat wêreldklas produkte skep.”

Die wenproduk. Foto verskaf

Die SA Suiwelkampioenskappe word al sedert 1834 deur Agri-Expo aangebied. Algemene bestuurder Breyton Milford sê die kompetisie vier nie net Suid-Afrika se uitstekende suiwelprodukte nie, maar beklemtoon ook die bedryf se ekonomiese bydrae en die balans tussen groot maatskappye en klein vervaardigers.

“Baie geluk aan Fair Cape Dairies wat ses Qualité-toekennings ontvang het; Lactalis South Africa met vier; Fairfield Dairy met drie; en Dalewood Fromage, Fairview, Klein River Cheese, Ladismith Cheese en Lancewood elk met twee. Almal se prestasies is ’n bewys van ’n innoverende en mededingende bedryf,” sê Milford.

Suid-Afrika se uitstekende suiwelprodukte word met toekennings gevier. Foto: Agri-Expo

Jong talent kry erkenning met Game Changer-toekenning

Die tweede Hollard Game Changer-toekenning is toegeken aan die 31-jarige Pamella Dzindikwa, produksiebestuurder by Puglia Cheese. Sy het haar loopbaan as skoonmaker begin en deur harde werk en toewyding tot ’n sleutelrol in die maatskappy gevorder. Sy ontvang ’n kontantprys van R50 000 vir haar prestasie. 

“Hierdie toekenning erken jong beroepslui wat reeds ’n beduidende impak maak en dien as motivering vir hul toekomstige sukses,” sê Milford.

Bedryf se sukses gebou op samewerking

Milford het ook die rol van vennote in die sukses van die projek beklemtoon, met dank aan onder meer IMCD South Africa, dsm-firmenich, Novonesis, SIG, Woolworths, en die Wes-Kaapse Departement van Landbou.

Linda Segalla van IMCD sê hulle is trots om die kampioenskappe te ondersteun. “Ons bly daartoe verbind om innoverende oplossings en kundigheid aan die suiwelbedryf te bied.”

Die 2025 Qualité-wenners:

Die Qualité-merk word net aan uitsonderlike produkte toegeken wat ’n minimum punt op die internasionale puntestelsel behaal het. Die produk met die hoogste punt word as Produk van die Jaar aangewys.

FAIR CAPE DAIRIES (6)

– Chocolate Mousse

– Laevet Gemengde Vrugte Joghurt

– Woolworths Custard met Vanieljesaad

– Woolworths Passion Fruit Cheesecake Mousse (Tweede plek algeheel)

– Woolworths Chocolate Mousse

– Woolworths Double Cream Lemon Curd Joghurt

LACTALIS SOUTH AFRICA (4)

– Parmalat Gesoute Botter

– Président Mature Gouda – 6 maande

– Président White Cheddar – 6 maande

– Woolworths Yellow Cheddar – 6 maande

FAIRFIELD DAIRY (3)

– First Choice Perske & Appelkoos Melksnack

– SPAR Double Cream Naturel Joghurt

– Woolworths Organiese Vetvrye Cottage Cheese

DALEWOOD FROMAGE (2)

– Wineland Brie Cape Chilli

– Lanquedoc – 10 weke

FAIRVIEW (2)

– Chevin Black Pepper & Paprika

– Woolworths Raspberry Roulade

KLEIN RIVER CHEESE (2)

– Babylonstoren Botter – Knoffel & Pietersielie

– Woolworths Oak Smoked Stanford

LADISMITH CHEESE (2)

– Gesoute Botter

– Ongegeurde Botter

LANCEWOOD (2)

– Cottage Cheese met Grasuie

– Pick n Pay Matured Cheddar – 6 maande

En ander wenners sluit in:

Dewfresh, Dutch Goat Farm, Farm Hill Dairy, Foxenburg Estate, La Montanara, Woodlands Dairy, en natuurlik die algehele wenner: RFG Foods se Mascarpone met Vye en Pekanneute.

OFM Agri/Verklaring cg