Volgens die Suid-Afrikaanse Landboumasjinerieassosiasie is 671 trekkers in Maart verkoop — amper 35% meer as die 498 eenhede wat in Maart 2024 van die hand gesit is. Tot dusver vir die jaar is trekkerverkope reeds byna 27% hoër as verlede jaar se syfers vir dieselfde tydperk.

Die verkope van stropers het ook ’n stewige hupstoot gekry. Sewe-en-dertig eenhede is in Maart verkoop, teenoor 26 in Maart 2024 – ’n toename van 11 eenhede. Vir die jaar tot dusver is stroperverkope nou byna 17% beter as verlede jaar.

Volgens voorsitter Willie Human bly markgevoel positief, wat weerspieël word in die sterker as verwagte verkope oor die afgelope paar maande. “Die goeie produksieramings vir somergewasse, in vergelyking met verlede seisoen, en die voortgesette reën speel ’n groot rol in hierdie positiewe sentiment.”

Die nat weer maak dit egter moeilik vir boere in sekere dele van die land om hul sojabone en sonneblom suksesvol te oes. Daarby begin internasionale politieke faktore ook ’n groter rol speel in die plaaslike mark, wat aanleiding gee tot ’n meer versigtige “wag-en-kyk”-benadering onder verskaffers en kopers van toerusting.

Voorspellings dui daarop dat trekkerverkope teen die einde van die jaar soortgelyk aan of effens hoër as verlede jaar se 6 463 eenhede kan wees. Vir stropers word daar verwag dat tussen 180 en 190 eenhede in 2025 verkoop sal word.

OFM Agri cg