Volgens AMT-ontleder dr. Johnny van der Merwe het die witmielieprys Dinsdag met R132 per t gedaal na R4 703 per t, terwyl die Julie 2025-prys ook afgeneem het tot R4 105 per t. 

Geelmielies het soortgelyke dalings ervaar, met die spotprys op R4 372 per t en die Julie 2025-prys op R4 020 per t.

Sojabone en sonneblomme toon aanvanklik styging

Sojaboonpryse het egter Maandag skerp gestyg nadat verhandelaars hul kort posisies moes terugkoop, wat ekstra koopdruk veroorsaak het. Die spotprys het gestyg tot R7 490 per t, maar het later begin daal na R7 640 per t vir Mei-kontrakte. 

Sonneblompryse het ook aanvanklik gestyg, maar die spotprys het later afgeneem tot R8 480 per t, met die Mei 2025-prys op R8 575 per t.

Internasionale markte bly onstuimig

Verskeie internasionale faktore beïnvloed steeds graanpryse. Die Amerikaanse regering oorweeg om ekstra tariewe in te stel op skepe wat in Sjina gebou is en VSA-hawens besoek. 

Indien dit geïmplementeer word, kan dit uitvoere van landbouprodukte en steenkool beïnvloed en moontlik sojaboonpryse tussen nege en sewe-en-twintig sent per bushel verhoog, wat uitvoere kan beperk.

In die VSA word verwag dat meer mielies en minder sojabone geplant sal word hierdie seisoen, wat verdere impak op pryse kan hê. Droë toestande in Amerikaanse koringproduksiegebiede bied egter ondersteuning aan koringpryse, terwyl Rusland se aanval op Oekraïense hawens die vraag na uitvoere verhoog en pryse verder opstoot.

Plaaslike markte beïnvloed deur kontrakverval

Maandag het witmielie- en sonneblompryse skerp gedaal toe verhandelaars hul lang posisies moes sluit as gevolg van die verval van Maart-kontrakte. Hierdie ooraanbod van verkope het pryse laat daal, maar dit was nie noodwendig gekoppel aan fundamentele faktore van hierdie seisoen se oes nie.

Terwyl witmielies en sonneblomme gedaal het, het sojabone en geelmielies sterk gestyg, aangesien kort posisies gesluit moes word. Die laat aankoms van ’n boot met ingevoerde sojabone het tekorte veroorsaak, wat verdere opwaartse druk op pryse geplaas het.

Teen Dinsdag het pryse egter weer begin daal, aangesien markte oorgeskakel het na April-kontrakte. Koringpryse bly in ’n stabiele opwaartse tendens, aangesien meer as 90% van die plaaslike oes reeds gelewer is.

Vooruitsigte vir graan- en vleismarkte

Somergrane kan moontlik hul afwaartse tendens voortsit, met die grootste daling in spotpryse wat tussen April en Mei verwag word. Die plaaslike oesskatting, wat vandag (26/3) bekend gemaak word, sal ’n bepalende rol speel, terwyl die VSA se beplande aanplantings op 1 April verdere rigting aan die markte kan gee. 

Indien die oesraming opwaarts aangepas word, kan Mei- en Julie-pryse onder verdere druk kom.

In die vleismark het speenkalfpryse effens gestyg, met nasionale pryse vir kalwers tussen 200 kg en 250 kg wat tans op R34,46 per kg verhandel. Direkte verkope het gestyg tot R35,13 per kg. Slagpryse vir beeste het verder gestyg, met A2/A3-karkasse wat nou op R56,81 per kg verhandel.

Skaap- en lammark bly sterk

Die gemiddelde stoorlamprys het gestyg na R41,06 per kg, terwyl die slaglamprys hoër is op R44,22 per kg. Direkte stoorlampryse het ook toegeneem na R40,95 per kg. Die Vrystaatse en Wes-Kaapse pryse bly sterk, met stoorlamme in die Vrystaat wat op R43,16 per kg verhandel en dié in die Wes-Kaap op R41,50 per kg.

Die gemiddelde lamprys is tans sowat 11% hoër as verlede jaar, maar steeds R1 laer as in 2022. In daardie jaar het pryse tot R54 per kg gestyg gedurende Junie, en indien tendense herhaal word, kan pryse weer hoër vlakke bereik.

Wol-, hoender- en varkmark tendense

Wolpryse styg voort, met RWS-skoonwolpryse op R187 per kg en nie-RWS-wolpryse op R184,70 per kg. In Australië het wolpryse ook toegeneem tot gemiddeld AU$12,50 per kg, gedryf deur sterk Chinese vraag.

Die hoendermark het sywaarts beweeg, met gevriesde pryse wat gestyg het tot R33,26 per kg, vars hoender op R36,93 per kg en EQF-pryse op R33,29 per kg.

Varkpryse bly stabiel, met spekvarke op R32,35 per kg, vleisvarke op R32,77 per kg en worsvarkpryse wat effens laer is op R25,10 per kg.

Algemene verwagtings

Die komende maande kan verdere prysbewegings in die graanmarkte bring, veral ná die bekendmaking van oesramings en VSA-aanplantingsyfers. In die vleismark kan pryse effens daal gedurende die winter, maar beperkings op aanbod kan moontlik stabiliteit handhaaf.

OFM Agri mvh