Die organisasie het aangekondig dr. Charl van der Merwe sal voortaan dien as die nuwe bestuurder van die graanafdeling. Hy volg op Wessel Lemmer, wat vanjaar by Raisins SA aangesluit het as hoof uitvoerende beampte. Lemmer is ook ’n alumnus van die Universiteit van die Vrystaat.

“Met meer as 27 jaar se ondervinding in die landbousektor bring dr. Van der Merwe uitgebreide kennis van graanhantering, verkryging, markontleding en strategiese ontwikkeling na die organisasie,” lui ’n verklaring van Agbiz.

Dr. Charl van der Merwe. Foto verskaf

Van der Merwe het oor die jare sleutelrolle in die graanwaardeketting vervul, van landbou-ekonomie en kommoditeitsbestuur tot strategiese besigheidsontwikkeling en verkryging. Hy het voorheen by toonaangewende landbou-organisasies soos NWK, Suidwes Landbou, Tiger Brands en CMI gewerk, waar hy ’n diepgaande begrip van die uitdagings en geleenthede in die sektor ontwikkel het.

By Agbiz Grain sal hy fokus op beleidsvoorstelle, belanghebbende betrokkenheid en industrie-verteenwoordiging om te verseker dat die graanbedryf mededingend en volhoubaar bly. Sy leierskap en bedryfservaring sal ’n sleutelrol speel in die versterking van Agbiz Grain se missie om sy lede se belange te ondersteun en te bevorder.

Dr. Van der Merwe beskik oor verskeie akademiese kwalifikasies in landboubestuur van die Universiteit van die Vrystaat:

• Baccalaureus in Landbou-bestuur (1995)
• Nagraadse Diploma in Landbou-bestuur (1996)
• Meestersgraad in Landbou-bestuur (2000)
• Doktorsgraad in Landbou-bestuur (2013)

Hy het in die Noord-Kaap grootgeword en is tans betrokke by ’n skaapboerdery in die Karoo. In sy vrye tyd geniet hy dit om in die natuur te wees, wild te besigtig en sy kinders se sportaktiwiteite te ondersteun.

OFM Agri cg