Witmielie- en sojaboonpryse bly steeds op hoër vlakke, terwyl geelmielies en sonneblomme afgeneem het. Intussen het vleispryse gewissel, met speenkalfpryse wat steeds styg, terwyl slagpryse in sommige sektore druk ervaar. 

Safex-pryse bly wisselvallig

Volgens AMT-ontleder, dr. Johnny van der Merwe, het die week se Safex-pryse gemengde resultate getoon. Die witmielie-spotprys het week-op-week gestyg na R6 960 per t, terwyl die Julie 2025-kontrak op R4 700 per t staan. Geelmielies het egter gedaal na R5 641 per t, met die Julie-kontrak nou op R4 312 per t.

Sojaboonpryse het ook gedaal. Die spotprys het gesak na R9 500 per t, terwyl die Mei-kontrak teen R8 130 per t verhandel. Sonneblom-spotpryse het na R10 309 per t gedaal, met die Mei-kontrak op R9 882 per t.

Koring se spotprys het effens afgeneem na R5 997 per t, terwyl die Desember-kontrak op R6 151 per t staan. Die sorguminvoerpariteitsprys in Durban is tans R5 738 per t, terwyl uitgedopte Argentynse grondbone teen R27 583 per t verhandel word. Katoenpryse is op R10 570 per t.

Internasionale invloed op markte

Twee groot internasionale stories het die week landboumarkte beïnvloed:

1. Trump se nuwe tariewe: Die inhuldiging van die Amerikaanse president het onsekerheid geskep oor toekomstige tariewe op invoere, veral teen Sjina en Kanada. Dit kan die vraag na Amerikaanse landbouprodukte negatief beïnvloed en plaaslike markte indirek raak as wêreldpryse daal.
2. Brasilië se sojaboonoestempo: Ondanks gunstige oeste in Brasilië, is stroopwerk stadiger as verlede jaar weens nat weer en laat plantdatums. Sjina het ook sy sojabooninvoere van Amerika na Brasilië verskuif, wat groot druk op Amerikaanse pryse geplaas het.

Plaaslike uitdagings en vooruitgang

Plaaslike mieliepryse bly hoër namate die produksieseisoen nader kom. Daar is egter kommer oor die moontlike invoer van mielies vanaf Amerika, wat pryse onder druk kan plaas as die invoere gerealiseer.

Verder is daar groot besorgdheid oor die eerste voorkoms van verwelksiekte in Suid-Afrika, wat reeds in vier provinsies aangemeld is. Hoewel die siekte nie ’n risiko vir menslike gesondheid inhou nie, kan dit mielie-opbrengste en -kwaliteit beïnvloed. 

Minder as 5% van die land se mielie-aanplantings is vatbaar, maar indien die probleem nie betyds aangespreek word nie, kan dit uitvoere negatief beïnvloed. Botswana het reeds alle invoere van Suid-Afrikaanse mielies gestaak, en ander lande mag volg.

Sterk speenkalfpryse handhaaf momentum

Volgens Dr. Johnny Van der Merwe, het speenkalfpryse die afgelope week sterk gebly en selfs verder gestyg. Die nasionale gemiddelde prys vir speenkalwers tussen 200-250 kg het gestyg na R34,19 per kg, terwyl direkte verkope effens hoër verhandel op R34,68 per kg.

Ligter kalwers tussen 160-200 kg het teen R34,67 per kg verhandel, en swaarder kalwers van 250-300 kg het gestyg na R32,40 per kg. In die Noord-Kaap het die gemiddelde prys op R33,27 per kg gestaan, terwyl pryse in Natal effens hoër was op R34,63 per kg.

Slagpryse ervaar afwaartse druk

Slagpryse toon ’n dalende tendens. Die A2/3-karkasprys het afgeneem tot R56,44 per kg, en die C-graad-prys het verder gedaal na R47,09 per kg. 

Pryse sal moontlik laer bly tot einde Februarie, met ’n verwagte styging vanaf Maart tot Mei.

Kalfpryse kan oor die volgende paar weke op huidige vlakke stabiliseer, maar daar word voorspel dat pryse later in Februarie weer kan styg indien belastingaankope toeneem. Reënval, soos voorspel vir Februarie, kan ook kalfpryse op ’n hoër vlak hou.

Skaapbedryf toon gemengde bewegings

Die gemiddelde stoorlamprys het met 1,5% gestyg na R40,60 per kg, terwyl slaglammers op R40,50 per kg bly. Direkte verkope van stoorlammers het gestyg na R41,26 per kg, en slaglampryse het hoër beweeg na R41,46 per kg.

In die Vrystaat het die stoorlamprys gestyg na R41,28 per kg, en in die Oos-Kaap staan dit nou op R42,11 per kg. Droë toestande in die Noord-Kaap het egter pryse laat daal na R37,74 per kg weens ’n hoër aanbod.

Wolpryse klim weens verswakte rand

Die tweede wolveiling van die jaar het ’n styging getoon. RWS-wolpryse het op R173,13 per kg gesluit, met nie-RWS-wol op R168,78 per kg. 

Die prysstyging is toegeskryf aan ’n verswakte rand en verbeterde vraag, veral in Australië.

Hoender- en varkvleispryse daal

Hoendervleispryse het afgeneem. Gevriesde hoender verhandel teen R32,97 per kg, terwyl vars pryse tot R37,27 per kg gedaal het. EQF-pryse staan tans op R33,00 per kg.

Varkpryse het meestal sywaarts beweeg. Spekvarkpryse is op R32,57 per kg, terwyl vleisvarkpryse laer is op R33,05 per kg. Worsvarkpryse het egter gestyg na R25,59 per kg.

Voermark ervaar druk

Die voermark beleef uitdagings, met lusernpryse wat verder gedaal het. Graad 1-lusern het laer verhandel op R2 900 per t, en prima binnelandse lusern op R3 300 per t. Die beskikbaarheid van hoë kwaliteit lusern bly egter beperk, met baie lusern wat as graad 2 of graad 3 gegradeer word.

Sojameelpryse is op R11 285 per t, en geel mieliepryse het gedaal na R5 660 per t. Die gemiddelde tjopprys het verder onder druk gekom en verhandel tans op R4 200 per t, weens ’n afname in die vraag na voer.

OFM Agri mvh