In vandag se wêreld speel internasionale geleenthede ’n toenemend belangrike rol in die ontwikkeling van jong Suid-Afrikaanse boere. Een so ’n geleentheid is seisoenale werk in Amerika waar baie jong landbouers die kans kry om praktiese vaardighede te ontwikkel en hul CV’s te bou. Om meer insig te kry oor die invloed van hierdie werk, het OFM Agri met Belinda Louw, direkteur van Peritum Agri Institute in Bloemfontein, gepraat.

Volgens Louw is Amerika ’n uitstekende geleentheid vir jong landbouers om hul vaardighede te verbeter. “Suid-Afrikaners is baie in aanvraag in Amerika veral as gevolg van ons sterk werketiek,” sê sy. In die verlede was dit maklik vir jong mense om bloot aansoek te doen vir seisoenale werk, maar deesdae het die plasingkriteria strenger geword. 

“Nou vereis dit ondervinding en gesertifiseerde opleiding om suksesvol vir ’n pos in aanmerking te kom en verder is tegnologie en masjinerie in Amerika baie gevorderd.”

Risiko’s van seisoenale werk

’n Groot vraag bly egter of daar ’n risiko bestaan dat Suid-Afrika sy waardevolle landboukundiges aan Amerika verloor. Louw sê egter die risiko is klein. Volgens haar navorsing verteenwoordig die sowat 15 000 Suid-Afrikaanse werkers wat seisoenaal in Amerika werk slegs 1% van die plaaslike landbousektor se arbeidsmag. Die groter geleenthede en vaardighede wat jong boere in Amerika opdoen weeg swaarder as die risiko dat hulle dalk permanent sal emigreer.

Die ervaring wat jong boere opdoen in Amerika help hulle om ’n wyer begrip van grootskaalse boerdery en tegnologie te ontwikkel. Louw glo hierdie blootstelling sal hul horison verbreed en boere wat terugkeer na Suid-Afrika sal ’n waardevolle bydrae tot die plaaslike landboubedryf lewer.

Invloed op Suid-Afrikaanse landbou

Louw verduidelik jong boere wat terugkeer na Suid-Afrika is dikwels goed toegerus met die jongste tegnologie en gevorderde masjinerie. Hierdie kennis kan hulle gebruik om hul eie boerderyondernemings te verbeter of kontrakteursdienste aan ander boere te lewer. “Ons het gesien die jong boere wat in Amerika gewerk het, is beter voorbereid om hul eie besighede te begin,” sê sy.

Die uitdagings vir jong boere wat terugkeer, lê egter in die aanpassing by plaaslike werkomstandighede en salarisse. Dit is belangrik dat hulle binne ses maande ná hul terugkeer in diens geneem word anders kan hulle weer terugkeer vir ’n nuwe seisoen in Amerika. Maar met die groei van indiensneming in die Suid-Afrikaanse landbousektor is daar goeie geleenthede vir hierdie jong boere om suksesvol te integreer.

Toekomstige geleenthede

Louw meen daar is steeds potensiaal om hierdie internasionale ervarings verder uit te brei. Sy sê daar is reeds gesprekke tussen Suid-Afrika en Amerika om meer jong swart landbouers die kans te bied om aan die H-2A-program deel te neem. Hierdie inisiatief saam met tegniese sertifikate soos die John Deere Certified Operator Program kan help om werkloosheid in Suid-Afrika te bekamp en die landbou-ekonomie verder te versterk.

“Die geleenthede wat seisoenale werk in Amerika bied, is beslis positief en kan baie voordele vir die Suid-Afrikaanse landbou inhou.”  

Seisoenale werk in Amerika bied nie net praktiese vaardighede en ondervinding nie, maar help ook om die jong boere van Suid-Afrika voor te berei vir ’n suksesvolle toekoms in die plaaslike landbousektor.

OFM Agri/Robyn Schutte dg