Agriculture
Suid-Afrika teken tweede grootste mielie-oes aan─── ELSABÉ RICHARD 08:08 Mon, 10 Jul 2023
Met somergewasse wat regoor Suid-Afrika geoes word, is die onlangse produksieskattings meer betroubaar en weerspieël dit die groot opbrengste wat boere steeds oes.
Wandile Sihlobo, hoofekonoom by die Landbousakekamer van Suid-Afrika (Agbiz), sê Suid-Afrika se Oesskattingskomitee het die land se 2022/23 kommersiële mielieproduksieskatting met 1% tot 16,35 miljoen ton opgehef vanaf Junie se skatting.
Hy sê dié oes is 6% meer as die 2021/22-seisoen en die tweede grootste oes op rekord.
"Die verwagte oes is hoofsaaklik as gevolg van groot opbrengste, aangesien die oppervlakte aangeplant effens laer is as die 2021/22-seisoen. Sowat 8,64 miljoen ton is witmielies, met 7,71 miljoen ton geel mielies.
" ’n Oes van 16,35 miljoen ton impliseer dat Suid-Afrika voldoende voorrade sal hê om binnelandse mieliebehoeftes van ongeveer 11,40 miljoen ton te voorsien en meer as 3 miljoen ton vir uitvoermarkte in die 2023/24-bemarkingsjaar te hê."
Sojabone
Sihlobo deel verder dat die sojabone-oes onveranderd was vanaf Mei se rekordskatting van 2,76 miljoen ton (24% hoër op 'n jaargrondslag).
Die jaarlikse oesverbetering is ook te danke aan 'n uitbreiding in die aangeplante oppervlakte en hoër opbrengste. Die sojabone-oes beteken dat Suid-Afrika in sy binnelandse vraag kan voorsien en met meer as 300 000 ton sojabone vir uitvoermarkte kan bly, sê Sihlobo.
"Hierdie uitbreiding van sojaboonuitvoer is 'n nuwe gebied vir Suid-Afrika, wat tot onlangs 'n netto invoerder van sojabone en sojaboonprodukte was, wat positief vir die landbouhandelsbalans is."
Sonneblom
Die sonneblomsaadproduksieskatting is egter met 5% verlaag vanaf verlede maand (Junie) op 758 610 ton (10% laer op 'n jaargrondslag). Die jaarlikse afname in die sonneblomsaadproduksievoorspelling weerspieël die verminderde aangeplante oppervlakte en opbrengste in sommige gebiede.
Sorghum
Sorghum-produksieskatting is 1% laer as verlede maand en word nou geraam op 103 870 ton (1% hoër op jaargrondslag). Ander klein gewasse, soos grondbone en droëbone, is onveranderd gelaat vanaf verlede maand op onderskeidelik 51 510 ton (6% op jaargrondslag) en 48 560 ton (af 8% op jaarbasis), deel Sihlobo verder.
"Oor die algemeen het Suid-Afrika groot somergraan- en oliesade-oes, en die onlangse reën het nie kwaliteitsprobleme veroorsaak soos sommige dalk gevrees het nie.
"Vanuit ’n graanverbruikersperspektief voorspel hierdie data goed met die reeds verswakkende mielie- en oliesaadpryse en versterk ons siening van 'n moontlike moderering in graanverwante voedselprodukpryse in die voedselinflasiemandjie."
