Volgens die Landbousakekamer van Suid-Afrika (Agbiz) se Wandile Sihlobo sal boere in die Wes- en Noord-Kaap, Vrystaat, Limpopo en ander wintergewasverbouingstreke begin om die grond voor te berei vir 2023/24 winterkoring, kanola, gars en hawerproduksie.

Hy verduidelik dat diegene wat somergewasse produseer, gedurende April begin oes. Boere wat in die winterreënvalgebiede geleë is, begin die grond voorberei om gewasse te plant.

Sihlobo sê dit is tans onduidelik hoeveel oppervlakte vir elke gewas aangeplant gaan word. 

"Die Oesskattingskomitee sal die boere se voornemens om data, en sleutelsyfers vir die potensiële oppervlakte-aanplantings, op 26 April bekend maak. Ons verwag dat die meeste gewasse se aanplantings die vyfjaar gemiddelde oppervlakte sal oorskry. 

"Die koring vyfjaar-gemiddelde oppervlakte aangeplant is byvoorbeeld 528 690 hektaar, wat 7% laer is as die oppervlakte-aanplantings vir die 2022/23-produksieseisoen. Daarom twyfel ons of die 2023/24-seisoen 'n gebied onder die vyfjaar-gemiddelde sal sien. Koringpryse, hoewel dit die afgelope maande ietwat versag het, bly relatief aantreklik vir boere," verduidelik Sihlobo.

Weerstoestande

Volgens die hooflandbou-ekonoom bly weerstoestande vir wintergewasse positief. Die Suid-Afrikaanse Weerdiens het in sy seisoenale klimaatsverslag, wat op 3 April 2023 gepubliseer is, opgemerk dat terwyl die weerstoestande besig is om oor te skakel na die El Nino-verskynsel, wat tipies onder-normale reën in 'n groot deel van die land bring, die wintergewasverbouingstreke van Suid-Afrika reën sal kry. 

"Dit is positief vir die seisoen. Boonop behoort die gebiede wat onder besproeiing in Limpopo, Vrystaat, Noord-Kaap en ander provinsies van Suid-Afrika produseer ook te floreer, en voordeel te trek uit die 2022/23 grondvog en verbeterde damvlakke."

OFM-nuus