Die Sol Plaatje Munisipaliteit in Kimberley is deur die hooggeregshof in Kimberley beveel om ’n gedetailleerde vorderingsverslag in te dien rakende die voortslepende rioolbesoedeling by Kamfersdam. 

Die munisipaliteit is ’n streng sperdatum van 20 Mei gegee om aan hierdie uitspraak gehoor te gee. Dr. Delmaine Christians, ’n DA-parlementslid, kritiseer die stadige pas van optrede in die aanpak van die kwessie en sê dit is skandelik dat die munisipaliteit nie vinniger vordering gemaak het nie. 

Kamfersdam se rioolbesoedeling hou gevare in vir die flaminke. Foto iStock

Sy beklemtoon dat die munisipaliteit se versuim om die krisis aan te spreek die situasie in ’n toestand van omgewingsagteruitgang gelaat het. As deel van die hofbevel eis die DA dat Bentley Vass, die LUR vir samewerkende regering, menslike nedersettings en tradisionele sake in die Noord-Kaap, noukeurig toesig hou oor die munisipaliteit se nakoming van die uitspraak. 

“Die verslag wat ingedien moet word, moet ’n gedetailleerde begroting, ’n duidelike tydlyn vir fondstoewysing en die munisipaliteit se vordering om die rioolafvoer in Kamfersdam te stop, insluit. Daarbenewens word van die munisipaliteit verwag om opgedateerde waterontledingsresultate van die geaffekteerde gebiede te verskaf,” sê Christians.

LEES OOK: VF Plus in Sol Plaatje wend hom tot MRK weens rioolstorting – VIDEOS

’n Kritiese deel van die verslag is die munisipaliteit se plan vir die rehabilitasie van die rioolinfrastruktuur en die Homevale-afvalwatersuiweringsaanleg, wat ’n bron van kommer was. Christians  sê die munisipaliteit bedryf twee rioolsuiweringsaanlegte in Kimberley: Greenpoint en Homevale. 

“Ten spyte daarvan dat die Homevale-aanleg verantwoordelik is vir die behandeling van water voordat dit in Kamfersdam vloei, het DA-raadslede egter gevind dat die aanleg sedert 2019 nie ten volle in werking is nie. Inspeksies wat so onlangs as Januarie vanjaar gedoen is, het bevestig dat hierdie wanfunksie steeds tot die besoedeling van die dam bygedra het.”

Sy sê die onbehandelde riool wat uit die munisipaliteit se aanlegte vloei, het wydverspreide besoedeling veroorsaak, wat gelei het tot die dood van honderde watervoëls, insluitend die flaminke.

Kamfersdam. Foto: BirdLife SA

BirdLife SA, saam met die Universiteit van Pretoria, het die sterftes met botulisme verbind, ’n toestand wat veroorsaak word deur die bakteriese wanbalans wat voortspruit uit die onbehandelde riool in die dam. Christians het ook die ANC-geleide munisipaliteit gekritiseer, wat sy meen nie daarin geslaag het om die stad se rioolprobleme doeltreffend aan te spreek nie. 

Sy het gevra vir beter leierskap om verdere omgewingskade te voorkom en het daarop aangedring dat sterker optrede nodig is om Kimberley se natuurlike hulpbronne te beskerm. Sy sê ’n dringende brief is aan  die LUR Vass gestuur waar versoek word da thy versoek verseker dat die munisipaliteit aan die hofbevel voldoen. 

“Dit is van kardinale belang dat daar langtermyn monitering is om te verseker dat hierdie situasie ten volle reggestel word,” sê Christians. OFM Nuus het die munisipaliteit gekontak om kommentaar oor die aangeleentheid, maar geen reaksie is nog ontvang nie.

OFM Nuus mvh