Die vonnis is egter vir vyf jaar opgeskort, met die voorwaarde dat hy die volle termyn in die gesig staar indien hy in daardie tyd aan soortgelyke oortredings skuldig bevind word. Sy besonderhede is by die register van seksoortreders gevoeg, en hy is ook onbevoeg verklaar om ’n vuurwapen te besit, sê sers. Mahlomola Kareli, Vrystaatse polisiewoordvoerder.

Die misdade het tussen 1 Januarie 2022 en 9 Maart 2023 plaasgevind waartydens die slagoffer slegs 15 jaar oud was.

Volgens Kareli is die ondersoek begin toe die jong meisie haar berader in vertroue vertel het oor die onvanpaste boodskappe en seksuele opmerkings wat haar stiefpa aan haar gestuur het, en haar selfs “liefie” genoem het. Hierdie onthulling het die ondersoek aan die gang gesit.

Lekkers, sjokolade aangebied in ruil vir seksuele dade

“Die polisieondersoek het verdere ontstellende besonderhede aan die lig gebring, insluitend die feit dat die beskuldigde pornografiese materiaal aan die slagoffer gestuur het, eksplisiete seksuele opmerkings gemaak het en haar pornografiese video’s by die huis gewys het.”

Kareli sê die stiefpa het ook vir haar lekkers en sjokolade aangebied in ruil vir seksuele dade, benewens dat hy haar fisies aangerand het.

Moedig slagoffers aan om dade aan te meld

“Ons speurders het deeglik en met groot sorg aan hierdie saak gewerk. Ons was deurlopend in kontak met Ronel Botha, die Nasionale Vervolgingsgesag (NVG) se advokaat, en het saam met haar gewerk om ’n sterk saak te bou en te verseker dat geregtigheid geskied,” sê Kareli.

Hierdie saak beklemtoon die erns van sulke oortredings, en die samelewing moet verantwoordelikheid neem om kwesbare individue te beskerm. Ons moedig enigiemand aan wat ’n slagoffer is of inligting oor sulke misdade het om dit by hul naaste polisiestasie aan te meld. Ons is daartoe verbind om geregtigheid vir slagoffers te verseker.”

OFM Nuus cg